Kásipqoı boks: Álı Ahmedov WBC tıtýlynan aıyryldy

ASTANA.KAZINFORM - Qazaqstandyq kásipqoı boksshy Álı Ahmedov (23-1,17KO) Astanada ótken kezekti jekpe-jeginde jeńilis tapty.

Qazaqstandyq boksshy All Stars Boxing promoýterlik kompanııasy ótkizgen boks keshiniń basty aıqasynda polshalyq boksshy Matseı Sýletskımen (32-3,12KO) judyryqtasty.

Birinshi raýnd bastala sala, qazaqstandyq boksshy qarsylastyń djep soqqysyn ótkizip, nokdaýn alyp qaldy. Osy oraıly sátti paıdalanǵan qarsylasy shabýyldy jedeldetip, Álı birinshi raýndta taǵy bir ret nokdaýn aldy.

Alaıda, qazaqstandyq boksshy tez esin jıyp, birinshi nómirde judyryqtasa bastady.

Jetinshi raýndta, qazaqstandyq boksshy jaqsy soqqylar jasaı bildi. Raýnd sońynda, ol qarsylastyń taǵy bir aýyr soqqysyn ótkizip alyp, tóreshi esep ashty.

Sońǵy onynshy raýndta Álı Ahmedov qarsylasqa laıyqty qarsylyq tanyta almady. Kezekti nokdaýnnan keıin qazaqstandyq boksshynyń bapkeri jekpe-jekti ary qaraı jalǵastyrýdan bas tartty.

Osylaısha, Álı Ahmedov kásipqoı mansabynda ekinshi ret jeńilip, WBC Silver tıtýlynan aıyryldy.

Álı Ahmedov sońǵy jekpe-jegin 17 qańtar kúni AQSh-ta ótkizip, amerıkalyq boksshy Malkolm Djonsty ekinshi raýndta jeńgen bolatyn.

Osyǵan deıin Álı Ahmedovtyń Astanada WBC Silver tıtýly úshin judyryqtasatyny týraly jazdyq.