Kásipqoı boks: Aleksandr Ýsık chempıondyq belbeýlerinen bas tartatynyn málimdedi
ASTANA. KAZINFORM – Ýkraınalyq boksshy Aleksandr Ýsık ózine tıesili barlyq chempıondyq belbeýden bas tartatynyn málimdedi. Bul týraly ol Instagram jelisinde jarııalaǵan beıneúndeýinde aıtty, dep habarlaıdy VVS.
– Men qazir qolymdaǵy barlyq chempıondyq belbeýden bas tartqym keledi. Kezekte turǵan jigitter sol belbeýler úshin judyryqtassyn, – dedi Ýsık.
Degenmen boksshy sporttyq mansabyn aıaqtamaıtynyn atap ótti.
– Men belbeýlerdi bosatamyn, biraq sporttan ketpeımin. Óıtkeni mende last dance – sońǵy bıim bar, – dedi ol.
Ýsıktiń aıtýynsha, bul – sanaly túrde qabyldanǵan sheshim.
– Bul sheshim men úshin jańa múmkindikterge jol ashady dep senemin. Bul – oqıǵanyń sońy emes. Jalǵasy áli alda, – dep qosty boksshy.
Qazir Aleksandr Ýsık asa aýyr salmaqta WBC, WBA jáne IBF nusqalary boıynsha absolıýtti álem chempıony sanalady.
Kásipqoı mansabynda ol birde-bir ret jeńilgen emes. Ýsık 25 jekpe-jek ótkizip, barlyǵynda jeńiske jetti. Onyń 16-syn merziminen buryn aıaqtaǵan.
Sońǵy jekpe-jegin mamyr aıynyń sońynda ótkizip, «kıkboksıng koroli» atanyp ketken nıderlandtyq Rıko Verhývendi nokaýtpen jeńgen.
Eske sala ketsek, buǵan deıin Aleksandr Ýsık taǵy da asa aýyr salmaqta absolıýtti álem chempıony atanǵanyn jazdyq.
