Kásipkerlikti memlekettik qoldaý sharalarynyń ortalyqtandyrylǵan tizilimi jasalady
ASTANA. KAZINFORM — Kásipkerlikti memlekettik qoldaý sharalarynyń ortalyqtandyrylǵan tizilimi jasalady. Bul týraly Premer-Mınıstr Oljas Bektenovtiń Májilis depýtattarynyń saýalyna bergen jaýabynda aıtylǵan.
«1 qyrkúıekke deıin kvazımemlekettik sektor sýbektileri úshin naryqtyq emes (jeńildikti) sharttarda Ulttyq qordan memlekettik qarjylandyrýdy tartýǵa tyıym salý josparlanyp otyr. Kásipkerlikti memlekettik qoldaý sharalaryn kórsetý tártibin standarttaý jónindegi sharalar aıasynda „Báıterek“ holdıngi mysalynda kásipkerlikti memlekettik qoldaý sharalarynyń ortalyqtandyrylǵan tizilimin qalyptastyrý kózdelýde. Árbir enshiles uıymda memlekettik qoldaý sharalaryn kórsetý boıynsha qyzmetterdi reglamentteý men pasporttaý engiziledi», — dep atap ótedi Úkimet basshysy jaýabynda.
Premer-Mınıstrdiń atap ótýinshe, ekonomıkany yryqtandyrý jóninde qabyldanatyn barlyq shara boıynsha jumys nátıjesi toqsan saıyn ekonomıkany monopolııasyzdandyrý komıssııasynyń qaraýyna shyǵarylady.
«Ekonomıkany yryqtandyrý jónindegi sharalardy iske asyrý Úkimettiń qatań baqylaýynda jáne belgilengen merzimde oryndalady», — dedi Oljas Bektenov.
