Kásipkerlikke kedergi jasaǵan: Bas prokýratýra Almaty oblysynda tergeý júrgizip jatyr

QONAEV. KAZINFORM - Almaty oblysynyń ákimdigi men «International Academy of medicine and sciences» JShS arasynda memlekettik-jekemenshik áriptestik kelisim arasynda daý týyndady.

Májilis depýtaty Irına Smırnovanyń resmı saýalyna joldaǵan jaýabynda QR Bas prokýratýrasy Almaty oblysyndaǵy ınvestordyń máselesi týraly túsinikteme bergen. Resmı málimetke sáıkes, «International Academy of medicine and sciences» JShS Almaty oblysynyń Densaýlyq saqtaý basqarmasynan «Almaty kópsalaly klınıkalyq aýrýhanasyn» satyp alý quqyǵynsyz 30 jylǵa senimgerlik basqarýǵa alǵan. 

Kompanııa óz mindetine saı 4,4 mlrd teńgeden astam ınvestıtsııa salǵan. Onyń ishinde, 891 mln teńge kredıtorlyq bereshekti ótegen, ınfektsııalyq korpýsty salǵan jáne ortalyq sýmen jabdyqtaý qurylysyna joba əzirlegen. Alaıda basqarma kelisim boıynsha óz mindetin atqarmaǵan.

- Memlekettik əriptes sharttyq talaptardy saqtamaı otyr: bir jyldan astam syıaqy tólenbeýde, salynǵan ınfektsııalyq korpýs teńgerimge qabyldanbaǵan, ınjenerlik jeliler qosylmaǵan, - delingen jaýapta.

Bas prokýratýra málimetinshe, daý oblys əkiminiń ókimimen 2022 jyly tamyzda ınvestordyń qarjy-sharýashylyq qyzmetin tekserýge talpynýynan jáne basqarmanyń aýrýhananyń bas dərigerimen eńbek shartyn jasaýǵa əreket etip, onyń qyzmetin belgilemek bolǵanynan týyndaǵan.

- 2025 jyl 24 aqpan kúni Sybaılas jemqorlyqqa qarsy is-qımyl agenttiginiń Almaty oblysy boıynsha departamenti basqarmanyń laýazymdy tulǵalaryna qatysty Qylmystyq kodekstiń 365-baby 3-bóligi 2-tarmaǵy (zańdy kásipkerlik qyzmetpen aınalysýǵa kedergi jasaý) boıynsha sotqa deıingi tergep-tekserýdi bastady, - delingen Bas prokýratýra jaýabynda.

Almaty oblysynyń ákimdigi bıyl 6 naýryz kúni sot sheshimi boıynsha nysan aýmaǵynda jergilikti atqarýshy organy men kompanııa ókilderi arasynda kezdesý ótkenin habarlady.

- Kelissózder barysynda taraptar jobany iske asyrýdyń negizgi máseleleri boıynsha kelisimge keldi. Oblys ákimdigi daýly máselelerdi retteý úshin sharalar qabyldady. Sonymen qatar Sybaılas jemqorlyqqa qarsy qyzmet qylmystyq is qozǵady, sotqa deıingi tergeý júrip jatyr, - dep habarlady oblys ákimdiginen.

Eske salaıyq, buǵan deıin Almaty oblysyndaǵy úsh aýysymdy mektepterdiń máselesi týraly jazǵanbyz.