Kásipkerlerge qoldaý kórsetetin JI bıznes-kómekshi quraly jetildirilip jatyr
ASTANA. KAZINFORM – Kásipkerlerge barlyq kezeńde qoldaý kórsetetin jasandy ıntellekt bıznes-kómekshi quraly jetildirilip jatyr. Bul týraly Elektrondyq qarjy ortalyǵynyń basqarma tóraǵasy Dııas Kramsheev aıtty.
– Elektrondyq qarjy ortalyǵynda jasandy ıntellektini damytýǵa udaıy kóńil bólinip keledi. Qolǵa alynǵan perspektıvaly sheshimderdiń biri – JI bıznes-kómekshi jobasy. Atalǵan qural kásipkerlerge barlyq kezeńde, ıaǵnı bıznestiń ıdeıa satysynan bastap ony naqty júzege asyrýǵa deıin qoldaý kórsetýge arnalǵan. Ozyq júıede qarastyrylatyn negizgi fýnktsıonaldardyń biri – bolashaq kásipke arnalǵan utymdy oryndy tańdaý. Tıimdi tańdalǵan jer – bıznestiń tabysty bolýyndaǵy mańyzdy faktor. Ol satý deńgeıin, básekege qabiletti ortany jáne bolashaq operatsııalyq shyǵyndardy anyqtaıdy, - dedi ortalyq basshysy.
Onyń aıtýynsha, JI-kómekshi memlekettik aqparattyq resýrstarmen ıntegratsııalanǵan jáne aýdandardyń ekonomıkalyq belsendiligi, suranys qurylymy, jumyspen qamtý deńgeıi, básekelestik orta, salalardyń damý serpini syndy senimdi derekterdiń aýqymdy jıyntyǵyn taldaýǵa qaýqarly. Osy málimetterge súıene otyryp, tıisti algorıtmder kózdelgen kiris mólsherin, rentabeldikti jáne táýekelderdi boljap, ár lokatsııaǵa daıyn usynystar jasaı alady.
– Atalǵan tetikti paıdalaný qabyldanatyn sheshimderdiń sapasyn edáýir jaqsartyp, bastapqy kezeńdegi qatelikterden saqtanýǵa kómektesedi. Shaǵyn jáne orta bıznestiń derekterge baǵdarlanǵan tásiliniń jańa standartyn qalyptastyrady, - dedi Dııas Kramsheev.
Ortalyq basshysynyń atap ótýinshe, tsıfrlyq jańǵyrtýdyń kelesi kezeńi proaktıvti qyzmetti jolǵa qoıýmen baılanysty. Málimetterdiń jınaqtalýyna baılanysty memlekettik júıeler kásipkerlerdiń qajettilikterin avtomatty túrde anyqtap, olarǵa tıisti memlekettik qoldaý sharalaryn, jeńildetilgen baǵdarlamalar men mańyzdy habarlamalardy usynatyn bolady.
– Demek, isker azamat qajetti qyzmetti izdep áýre bolmaıdy, kerisinshe «qyzmet paıdalanýshyny ózi tabady» modeline basymdyq beriledi. Memlekettik servısterdi ıntegratsııalaý, biryńǵaı jeke kabınetti qurý men JI sheshimderin damytý – ozyq tsıfrly ekojúıeni qalyptastyrýǵa jol ashady. Osy arqyly memlekettik organdarmen ózara is-qımyl tıimdi, jyldam jáne tehnologııalyq turǵydan alǵanda, zamanǵa saı bolady. Óz kezeginde kásipkerler senimdi jáne ornyqty ósimge múmkindik beretin tyń tetikke qol jetkizedi, - dedi ol.
Aıta keteıik, Qazaqstan halqyn Jańa jylmen quttyqtaǵan Memleket basshysy Qasym-Jomart Toqaev 2026 jyldy Tsıfrlandyrý jáne jasandy ıntellekt jyly dep jarııalaǵan edi.
Sondaı-aq «Turkistan» gazetinde jarııalanǵan keń kólemdi suhbatynda Memleket basshysy Qasym-Jomart Toqaev memleket kórsetetin qyzmetterdi, qarjy tehnologııalaryn, ekonomıkanyń birqatar sektoryn tsıfrlandyrý isinde naqty jetistikterimiz baryn atap ótken edi.