Kásipkerlerge arnalǵan 150 memlekettik qoldaý sharasy onlaın formatqa kóshiriledi
ASTANA. KAZINFORM — Qazaqstanda kásipkerlerge arnalǵan barlyq 150 memlekettik qoldaý sharasyn onlaın rásimdeý josparlanyp otyr. Bul týraly Úkimet otyrysynda Ulttyq ekonomıka vıtse-mınıstri Bekbolat Moldabekov aıtty.
Onyń aıtýynsha, búginde elimizde kásipkerlerge arnalǵan 150 memlekettik qoldaý sharasy bekitilgen. Olardyń tek 63-i ǵana elektrondy formatta qoljetimdi bolsa, qalǵan 87-si áli de qaǵaz túrinde kórsetilip keledi.
— Biz qaǵaz protsesterdi jaı ǵana elektrondy formatqa kóshirýdi emes, aldymen olardy qaıta qarap, artyq rásimder men ákimshilik kedergilerdi joıýdy kózdep otyrmyz, — dedi vıtse-mınıstr.
Osy maqsatta memlekettik qoldaý sharalaryn kezeń-kezeńimen eGov Business platformasyna kóshirý jumystary júrgizilip jatyr. Alǵashqy kezeńde tsıfrlandyrý úshin «Báıterek» ulttyq basqarýshy holdınginiń qoldaý quraldary tańdalǵan. 2024-2025 jyldary holdıng pen onyń enshiles uıymdary memlekettik qoldaý kórsetý protsesterine reınjınırıng júrgizgen. Sonyń nátıjesinde birqatar qyzmetti alý tártibi aıtarlyqtaı jeńildetilgen.
Máselen, buryn «QazAgroFınans» AQ 5 paıyzdyq jeńildetilgen lızıng baǵdarlamasy boıynsha ótinim berý jáne ony qaraý protsesi 80-nen astam qadamdy qamtyp, eki jumys kúnine deıin sozylatyn. Qaıta uıymdastyrýdan keıin rásimder sany shamamen 30 qadamǵa deıin qysqaryp, ótinimdi qaraý merzimi 5-10 mınýtqa deıin azaıǵan.
Kelesi kezeńde bul qyzmetter eGov Business portalymen biriktiriledi. Sonyń arqasynda memlekettik derekter negizinde kóptegen jol avtomatty túrde toltyrylyp, kásipker ótinimdi birneshe qadam arqyly ǵana bere alady.
— Portal men mobıldi qosymsha arqyly kásipkerler memlekettik qoldaý sharttarymen tanysyp, ótinim berýge, qajetti qujattarǵa qol qoıýǵa jáne ótinimniń qaralý mártebesin naqty ýaqyt rejıminde baqylaýǵa múmkindik alady. Qazirgi ýaqytta portal arqyly «Avtobýs lızıngi» memlekettik qoldaý sharasyna ótinim berý qyzmeti iske qosylǵan. Taǵy eki qyzmet engizilip jatyr, al 8-i kelesi kezeńge josparlanǵan, — dedi B. Moldabekov.
Vıtse-mınıstrdiń aıtýynsha, bıyl jyl sońyna deıin 20 memlekettik qoldaý sharasyn onlaın formatqa kóshirý kózdelip otyr. Al kelesi jyldyń sońyna qaraı kásipkerler barlyq 150 memlekettik qoldaý sharasyna elektrondy túrde ótinim bere alady.
Oǵan qosa, bolashaqta memlekettik qoldaý kórsetý júıesin proaktıvti formatqa kóshirý josparlanǵan. Onda memleket kásipkerdiń tsıfrlyq profıli men derekter taldaýy negizinde oǵan eń qolaıly qoldaý quraldaryn ózdiginen usynbaq.
Aıta keteıik, búgin Úkimet músheleri memlekettik qyzmetter salasynda jasandy ıntellektini engizý jumystaryn talqylady.
