Kásipkerlerdi 126 mln teńgege aldaǵan alaıaq Qyrǵyzstanda ustaldy

ASTANA. KAZINFORM – Almaty oblysynyń aýmaǵynda birqatar alaıaqtyq áreketter jasaǵany úshin kúdikti Bas prokýratýrasynyń suraý salý boıynsha Qyrǵyz Respýblıkasynan ekstradıtsııalandy. Bul týraly Bas prokýratýranyń baspasóz qyzmeti habarlady. 

— Tergeý barysynda 2019–2022 jyldar aralyǵynda qaskúnemniń aldyn ala josparlap ózge adamdarmen birge óńirdegi eń iri azyq-túlik bazarlarynyń birinde saýda býtıkterin satý syltaýymen azamattardy júıeli túrde aldap kelgeni anyqtaldy. Alaıaqtyq áreketteriniń nátıjesinde ol 11 kásipkerdiń jalpy 126 mıllıon teńge kólemindegi qarajatyn ıemdengen.

Qylmysty jasaǵannan keıin kúdikti quqyq qorǵaý organdarynan jasyrynyp, halyqaralyq izdeýge jarııalanǵan. Qazaqstan men Qyrǵyzstannyń quzyretti organdarynyń ózara tıimdi is-qımylynyń nátıjesinde bıylǵy tamyz aıynda ol Bishkek qalasynda ustaldy. Qazaqstan Respýblıkasy Bas prokýratýrasynyń resmı suraýy negizinde ol qylmystyq jaýaptylyqqa tartý úshin belgilengen tártippen eline ekstradıtsııalandy, — delingen habarlamada.

Qazirgi ýaqytta kúdikti tergeý ızolıatoryna qamaldy. Qylmystyq zańmen aıyptalǵan áreket úshin múlki tárkilenip, 5 jyldan 10 jylǵa deıingi merzimge bas bostandyǵynan aıyrý jazasy qarastyrylǵan.

Qazaqstan Respýblıkasynyń Bas prokýratýrasy ádilettilikti qalpyna keltirý jáne jábirlenýshi azamattardyń quqyqtaryn qorǵaý maqsatynda tergeýden jáne sottan jasyrynyp júrgen adamdardy anyqtaý, izdestirý jáne ekstradıtsııalaý boıynsha jumystardy jalǵastyryp jatyr. 

Aıta ketelik qyz zorlap, 13 jyl jasyrynyp júrgen kúdikti Qyrǵyzstannan ekstradıtsııalanǵan edi.