Kásipkerler jazasyn óteý mekemeleriniń janynan túrli kásiporyn ashýy kerek
ASTANA. KAZINFORM – Memleket basshysy Qasym-Jomart Toqaev quqyq qorǵaý organdarynyń keńeıtilgen alqa májilisinde raqymshylyq jasaý barlyq máseleniń sheshimi emes ekenin aıtty.
– Memleket shalys qadam basqan azamattan teris aınalmaıdy, tek onyń týra, durys jolǵa túsýine járdem beredi. Óıtkeni, ádiletti eldiń soty – ádil, nıeti túzý bolýǵa tıis. Biraq raqymshylyq jasaý degenimiz, bul – barlyq máseleniń sheshimi emes, bir rettik qana shara ekenin túsingen jón. Sondyqtan osy baǵytta naqty nátıje bolý úshin qylmystyq atqarý júıesin barynsha jetildirý qajet. Negizgi maqsat – sottalǵan adamdy qoǵamnan alshaqtatý emes, - dedi Prezıdent.
Memleket basshysy tıisti tárbıe jumysyn júrgizý óte mańyzdy ekenin atap ótti. Olardyń boıyna zań men tártip qundylyǵyn sińiretin jáne qalypty ómirge oralýyna yqpal etetin ozyq tásilderdi engizý kerek. Máselen, keıbir elde jazasyn óteýshiler «qamaý merzimin qysqartýǵa» múmkindik beretin sharalardy qoldana alady.
– Abaqtyda eskertý almaǵan, jańa bilim ıgergen, sporttyq-mádenı sharalarǵa qatysqan adamdarǵa osyndaı jeńildik beriledi. Úkimet Bas prokýratýramen birlesip, osy máseleni muqııat pysyqtaýy qajet. Sheteldiń ozyq tájirıbesin zerttegen jón. Bul jumysqa otandyq sarapshylardy da tartý qajet. Jazasyn ótep júrgenderdi qalypty ómirge daıyndaýdyń taǵy bir tıimdi joly – eńbekpen, ıaǵnı, jumyspen qamtý. Bul baǵytta biraz túıtkilder bar, naqty sharalar qoldaný kerek. Osy oraıda bizdiń kásipkerlerimiz jazasyn óteý mekemeleriniń janynan túrli kásiporyn ashý múmkindigin qarastyrýy kerek dep oılaımyn. Mundaı seriktestik shetelde keń taraǵan. Bul sharanyń eki jaqqa da tıgizer paıdasy mol. Jazasyn ótep júrgenderdiń tapqan tabysy bostandyqqa shyqqan soń olardyń qalypty ómirge oralýyna kómektesedi. Al óndiriste meńgergen daǵdysy jaqsy jumys tabýyna jol ashady. Jalpy, bıznes ókilderi qylmystyq-atqarý júıesimen jan-jaqty yqpaldastyq ornatý joldaryn muqııat saralaǵany jón. Mysaly, elimizdegi kompanııanyń biri óz qarjysyn jumsap, Almatyda kámelet jasyna tolmaǵan quqyq buzýshylarǵa arnalǵan zamanaýı tárbıeleý mekemesin salyp jatyr. Úkimet mundaı tásildi belsendi túrde qoldanýy kerek, basqa kompanııalardy osyndaı seriktestikke tartý qajet, - dedi Prezıdent.
Sonymen qatar qatelik jasap, qamaýǵa túsken adamdy janshyp, basyp tastaýǵa tyrysý durys emes ekenin, biz ondaı adamnyń týra jolǵa túsip, túzelip ketýine qol ushyn berýimiz kerek ekenin aıtty.
– Biz qazir qylmystyq jaza saıasatyn meılinshe izgilendirýge, jetildirýge basa mán beremiz, ıaǵnı bas bostandyǵynan aıyrýdan bólek jaza túrlerine basymdyq beriledi. Bul probatsııa qyzmetine anaǵurlym kóp salmaq túsedi degen sóz. Sondyqtan aımaq ákimderi osy salada jumys isteıtin adamdardyń áleýmettik jaǵdaıyn birtindep jaqsartý joldaryn qarastyrýy kerek. Sondaı-aq probatsııalyq qyzmettiń materıaldyq-tehnıkalyq bazasyn nyǵaıtýdy qolǵa alý qajet. Probatsııalyq baqylaýdy tıimdi júrgizýge septigin tıgizetin tsıfrlyq sheshimderdi belsendi túrde engizgen jón. Jalpy, biz kez kelgen máseleniń saldarymen emes, sebebimen kúresýimiz kerek. Qylmystyq-atqarý júıesiniń basty maqsaty tek jazalaý degen túsinikten arylý qajet. Qatelik jasap, qamaýǵa túsken adamdy janshyp, basyp tastaýǵa tyrysý – durys emes, biz ondaı adamnyń týra jolǵa túsip, túzelip ketýine qol ushyn berýimiz kerek. Bárimiz bir el bolyp órkenıetti, ozyq jáne ádiletti qoǵam quryp jatyrmyz. Zań da, sot ta – ádil bolýǵa mindetti. Bul – myzǵymas qaǵıda, - dedi Prezıdent.
Prezıdent Úkimetke mobıldi operatorlardyń jaýapkershiligin kúsheıtýdi tapsyrdy.