Kásipkerler tańbalaý shyǵyndaryna 50% qosymsha shegerim alady
ASTANA. KAZINFORM — Salyq kodeksin engizý jónindegi jobalyq keńseniń 16-shy otyrysynda taýarlardy tańbalaý júıesin engizý kezindegi bıznesti qosymsha qoldaý máselesi qaraldy. Bul týraly Úkimettiń baspasóz qyzmeti habarlady.
«Atameken» UKP tóraǵasynyń orynbasary Tımýr Járkenov atap ótkendeı, tańbalaýdy engizý bıznesten óndiristik jelini jańǵyrtý, jabdyq satyp alý sekildi birqatar edáýir shyǵyndy talap etedi. Kásipkerlerdiń qarjylyq aýyrtpalyǵyn azaıtý maqsatynda sáıkestendirýge qajet jabdyq satyp alýǵa jumsalǵan shyǵyndy shegerimge naqty jumsalǵan shyǵyn somasynyń 150% mólsherine jatqyzý usynyldy.
Jobalyq keńse otyrysyna qatysýshylar bul usynysty qoldady. Tıisti túzetý Salyq kodeksine engiziledi.
Sondaı-aq, otyrysta rezıdent emester úshin elektrondyq shot-faktýra jazý merzimin uzartý boıynsha túbegeıli sheshim qabyldandy. Merzim uzartylady. Qazirgi ýaqytta Memlekettik kirister komıteti men «Atameken» UKP normany túpkilikti pysyqtaýda. Rezıdent emester úshin EShF QQS boıynsha deklaratsııa tapsyratyn kúnnen bir jumys kúni buryn keshiktirilmeı jazylyp berilýi qajet.
Sonymen qatar, otyrysta eńbekaqy tóleý qory tólemderin birizdendirý boıynsha pılottyq jobany ázirleý jaıy talqylandy. Qazirgi ýaqytta olardy salyq tóleýshiniń kabıneti arqyly basqarý qarastyrylýda. Barlyq mindetti tólemdi esepteý úshin jumys berýshige qyzmetkerdiń JSN-y men onyń jalaqy mólsherin kórsetý jetkilikti. Júıe qajetti esepteýdi avtomatty túrde júrgizedi.
Osy tetikti engizý eńbekaqy tóleý qorynan tólem júrgizý mindettemelerin oryndaýdy edáýir jeńildetip, bıznestiń ákimshilik júktemesin qysqartýǵa, standartty esep aıyrysý operatsııalaryn oryndaý úshin býhgalterlik qyzmetti tartý qajettiligin azaıtýǵa múmkindik beredi.
Aıta ketelik salyq organdary zańsyz QQS shemalaryna qarsy baqylaýdy kúsheıtken edi.
