Kásipkerler Reseıge taýar eksporttaýdaǵy taǵy bir kedergiden qutylady: 15 sanatqa jańa múmkindik ashyldy
ASTANA. KAZINFORM — Endi qazaqstandyq óndirýshiler men eksporttaýshylar Reseı naryǵyna shyǵarý úshin qajetti tańbalaý kodtaryn deldalsyz, Tañba júıesi arqyly ala alady. Jańa múmkindik parfıýmerııa, kosmetıka, oıynshyq, kondıterlik ónimder, ósimdik maıy jáne taǵy 10 taýar tobyna qatysty. Bul týraly Saýda mınıstrligi málimdedi.
Mınıstrliktiń dereginshe, jańa júıe taýarlardyń mynadaı toptaryn qamtıdy: parfıýmerııa ónimderi, shınalar men dońǵalaq qaptamalary, fotoapparattar men fotojarqyl qurylǵylary, kosmetıka jáne turmystyq hımııa ónimderi, balalar oıyndary men oıynshyqtary, qaptalǵan aýyzsý, janýarlarǵa arnalǵan jem, bekire jáne albyrt balyqtarynyń ýyldyryǵy, velosıpedter men olardyń jaqtaýlary, qurylys materıaldarynyń jekelegen túrleri, antıseptıkter men dezınfektsııalaý quraldary, táttiler men kondıterlik ónimder, sporttyq taǵamdar, konserviler jáne ósimdik maılary.
— Modýldiń iske qosylýy Qazaqstan men Reseıde taýarlardy mindetti tańbalaýdy engizý merzimderiniń ártúrli bolýyna baılanysty týyndaıtyn qıyndyqtardy azaıtýǵa baǵyttalǵan, — dep habarlady vedomstvodan.
Máselen, Reseıde belgili bir taýardy tańbalaý mindetti bolyp, al Qazaqstanda mundaı talap áli engizilmegen jaǵdaıda, kásipker ónimin Reseı naryǵyna shyǵarý úshin reseılik tańbalaý kodyn alýy qajet. Bul talap marketpleıster arqyly satylatyn taýarlarǵa da qatysty. Endi kásipkerler qajetti kodtarǵa Tañba júıesi arqyly tapsyrys bere alady. Krıptografııalyq qorǵanysy bar kodtardy Reseıdiń «Operator-TsRPT» JShQ qalyptastyrady, al qazaqstandyq operator olardy rásimdeý men alýdy qamtamasyz etedi. Eki eldiń ulttyq júıeleri arasyndaǵy derekter almasý qorǵalǵan baılanys arnalary arqyly júzege asyrylady.
— Jańa tetik kásipkerlerge deldaldardyń kómeginsiz Tañba júıesi arqyly Reseıdiń tańbalaýǵa qatysty talaptaryn oryndaýǵa múmkindik beredi. Biz úshin eki elde tańbalaýdy engizý merzimderiniń ártúrli bolýy otandyq bızneske qosymsha kedergi keltirmeýi mańyzdy, — dedi Tsıfrlyq transformatsııa jáne taýarlardy tańbalaý departamenti dırektorynyń orynbasary Á.Óteǵalıev.
Kásipkerler alynǵan kodtardy Reseıge jetkiziletin taýarlarǵa ornalastyrady. Osylaısha, olar óz elindegi operator arqyly tańbalaý kodtaryna tapsyrys berip, Reseıdiń qoldanystaǵy talaptaryn oryndaı alady.
Atalǵan tetik Eýrazııalyq ekonomıkalyq odaqqa múshe elderdiń ulttyq tańbalaý júıeleriniń ózara is-qımyl tártibin aıqyndaıtyn Eýrazııalyq ekonomıkalyq komıssııa Keńesiniń 2021 jylǵy 5 naýryzdaǵy № 19 sheshimine sáıkes iske asyryldy.
Aıta keteıik, jeńil ónerkásip taýarlary boıynsha osyndaı tetik Qazaqstan men Reseı arasynda 2024 jyldan beri jumys isteıdi. Endi oǵan taýarlardyń taǵy 15 tobynyń qosylýy qazaqstandyq kásipkerlerdiń múmkindikterin keńeıtip, ónimderin Reseı naryǵyna jetkizýge daıyndaý protsesin jeńildetedi.
Aıta keteıik, qyrkúıekte Biryńǵaı ulttyq tańbalaý júıesindegi irkilisterge baılanysty kásipkerler temekini qabyldaý men satýda qıyndyqqa tap bolǵan edi.
