Kásipkerler nege alańdaıdy: Shymkentte jarnama tólemin birtindep kóterý usynyldy
ShYMKENT. KAZINFORM – Shymkentte syrtqy (kórneki) jarnama úshin tólenetin aı saıynǵy bazalyq tólemaqyny arttyrý máselesi qaraldy. Kásipkerler tólemdi birden kótermeı, kezeń-kezeńimen ósirýdi usyndy.
Shymkent qalasynyń Kásipkerler palatasynda syrtqy jarnamany ornalastyrý úshin tólenetin aı saıynǵy bazalyq tólemaqy mólsherlemelerin arttyrýdy kózdeıtin máslıhat sheshimi jobasy talqylandy.
Shymkent qalasy Kásipkerler palatasy dırektorynyń orynbasary Maııa Isaevanyń aıtýynsha, bul másele buǵan deıin de qaralǵan.
– Bastapqyda joba qalanyń basym bóliginde syrtqy jarnamany ornalastyrýǵa arnalǵan bazalyq mólsherlemelerdi birden 200 paıyzǵa arttyrýdy kózdedi. Kásipkerler qaýymdastyǵynyń usynystary eskerilip, qujat qosymsha pysyqtaýǵa jiberildi. Keıin memlekettik organdar, salalyq qaýymdastyqtar jáne kásipkerler qatysqan jumys keńesinde mólsherlemelerdi 100 paıyzǵa arttyrýdy qarastyratyn jańartylǵan joba talqylandy. Alaıda kásipkerler mundaı ósimniń ózi qarjylyq júktemeni arttyryp, syrtqy jarnama qyzmetteriniń qymbattaýyna, shaǵyn jáne orta bıznes úshin qoljetimdiliktiń tómendeýine, ınvestıtsııalyq belsendiliktiń báseńdeýine jáne básekelestik ortaǵa keri áser etýi múmkin ekenin jetkizdi, – dedi Maııa Isaeva.
Talqylaý barysynda kásipkerler qoldanystaǵy mólsherlemelerdi saqtaý nemese olardy kezeń-kezeńimen arttyrý tetigin engizý jóninde usynys bildirdi. Olardyń pikirinshe, mundaı tásil bızneske jańa talaptarǵa beıimdelýge múmkindik berip, qarjylyq júktemeni azaıtýǵa, jumys oryndaryn saqtaýǵa jáne syrtqy jarnama naryǵynyń turaqty damýyna yqpal etedi.
Sondaı-aq kásipkerler qaýymdastyǵy jobany máslıhat depýtattary men qoǵam ókilderiniń qatysýymen qosymsha talqylaý qajettigin atap ótti.
Otyrys barysynda Shymkent qalasy máslıhatynyń depýtaty Islambek Tólebaev mólsherlemelerdi bastapqy kezeńde 50 paıyzǵa arttyrýdy usyndy. Onyń aıtýynsha, Salyq kodeksiniń 655-baby mólsherlemelerdi birtindep ósirýge múmkindik beredi.
Depýtattyń pikirinshe, bul tásil engiziletin ózgeristerdiń naryqqa áserin, salanyń ekonomıkalyq ahýalyn jáne kásipkerlerge túsetin qarjylyq júktemeni baǵalaýǵa kómektesedi.
Jıyn qorytyndysy boıynsha Shymkent qalasy Kásipkerler palatasyna kásipkerler qaýymdastyǵynyń usynystaryn eskere otyryp, máslıhat sheshimi jobasynyń jańa redaktsııasyna saraptamalyq qorytyndy ázirleý usynyldy.
Sondaı-aq máslıhatqa bazalyq mólsherlemelerdi bastapqy kezeńde 50 paıyzǵa kóterý jáne keıin qabyldanǵan sheshimniń salaǵa áserine taldaý júrgizý máselesin qarastyrý jóninde usynym joldandy.
Buǵan deıin Shymkentte jarnama tólemin esepteý kásipkerler arasynda túsinbeýshilik týdyrǵany týraly jazǵan edik.
