Kásipkerler ımport taýarlardyń qunyn qoldan tómendetip salyqtan jaltarǵan — komıtet

ASTANA. KAZINFORM — Elimizde kásipkerlerdiń ımport taýarlardyń qunyn qoldan tómendetý arqyly salyq tóleýden jaltarý faktileri anyqtaldy. Bul týraly EAEO sheńberinde qosylǵan qun salyǵyn ákimshilendirý basqarmasynyń basshysy Aslan Tobyqbaev málim etti. 

— Ózderińiz bilesizder, elimiz Eýrazııalyq ekonomıkalyq odaqtyń múshesi, onyń aıasynda taýarlar kedendik jáne ózge de baqylaý joq, ıaǵnı erkin aınalymda. Alaıda, mundaı kedergisiz saýda rejımi keıbir adal emes kásipkerlerdiń túrli salyqtan jaltarý, sonyń ishinde ımport taýarlardyń qunyn tómendetýdi qoldanýyna ákelip otyr, — dedi Aslan Tobyqbaev Qarjy mınıstrligi Memlekettik kirister komıtetinde onlaın ótken brıfıngte.

Onyń aıtýynsha, qujatta naqty naryq qunnan áldeqaıda tómen baǵa kórsetiletin jaǵdaı jıi kezdesedi.

— Máselen, keń aýqymdy taýarlar boıynsha ımport baǵasynyń shyn máninde bar qunynan áldeqaıda tómen kórsetilgen kóptegen fakti anyqtaldy. Mysaly, bir kıimdi 50-60 teńgeden, aıaq kıimdi 150-160 teńgeden, al apelsınniń kelisin 50-60 teńgeden kórsetken jaǵdaı boldy. Mundaı baǵalar naqty qunǵa sáıkes kelmeıdi. Eshkim olardy tutynýshyǵa mundaı baǵada satpaıdy da, — dedi ol.

Buǵan deıin EAEO aıasynda tańbalaý júıesin engizý arqyly kóleńkeli ekonomıkamen kúres sharasy týraly habarlaǵan edik.