Kásipkerler endi bıznesti qoldaý qyzmetterin bir jerden ala alady
ASTANA. KAZINFORM — «Damý» qorynyń óńirlik jelisi bazasynda «Báıterek» holdınginiń Kásipkerlerdi qoldaý biryńǵaı front-ofısi jumysyn bastady, dep habarlaıdy Úkimettiń baspasóz qyzmeti.
Premer-mınıstrdiń orynbasary — ulttyq ekonomıka mınıstri Serik Jumanǵarın front-ofıstiń ashylýyna qatysyp, bıznesti qoldaýdyń jańa formatymen tanysty.
Biryńǵaı front-ofıs «Báıterek» toby uıymdarynyń qoldaý quraldaryn «biryńǵaı tereze» qaǵıdaty boıynsha biriktiredi. Munda kásipkerler keńes alyp, qolaıly qoldaý quralyn tańdaı alady. Ótinim berilip, qarjylandyrý qarastyrylýǵa deıin joba súıemeldenedi.
Front-ofıster Qazaqstannyń barlyq óńirinde «Damý» qorynyń fılıaldary bazasynda jumys isteıdi. Shalǵaı jatqan aýdandar men aýyldardaǵy kásipkerler úshin mamandardyń aýdandarǵa barýyna arnalǵan mobıldi keńseler – avtobýstar qarastyrylǵan. Osylaısha, óz ókildikteri joq keıbir damý ınstıtýttarynyń qajetti keńesi men qoldaýyn oblys ortalyǵyna barmaı-aq alýǵa bolady.
Front-ofıs konsýltanttary «Báıterek» tobynyń uıymdarǵa kórsetetin qoldaý quraldary boıynsha aqparat beredi:
- «Damý» kásipkerlikti damytý qory — shaǵyn jáne orta bıznesti jeńildikpen nesıelendirý, paıyzdyq mólsherlemeni sýbsıdııalaý, kepildik berý jáne qoldaýdyń qarjylyq emes sharalary;
-
Qazaqstannyń Damý banki — iri ınvestıtsııalyq jobalardy qarjylandyrý;
-
Qazaqstan Investment Corporation — tikeleı ınvestıtsııalar jáne venchýrlyq qarjylandyrý quraldary;
-
Qazaqstannyń eksporttyq-kredıttik agenttigi — eksporttyq nesıelerdi saqtandyrý;
-
Ónerkásipti damytý qory — kásiporyndardy jańǵyrtýǵa arnalǵan jeńildikti jáne lızıngtik qarjylandyrý.
— Búgingi tańda bizdiń mamandarymyz tek Qordyń quraldarymen jumys istep qoımaı, «Báıterek» holdınginiń basqa da uıymdary usynatyn sheshimderdi tańdaýǵa kómektesedi. Shyn máninde, «Damý» qorynyń óńirlik jelisi jeńildikpen nesıelendirý men kepildikterden bastap, ınvestıtsııalyq qarjylandyrýǵa, eksportty saqtandyrý men lızıngke deıingi qarjylyq jáne qarjylyq emes quraldardyń keń aýqymyna qol jetkizýdiń biryńǵaı terezesine aınalyp keledi, — dedi «Damý» qorynyń basqarma tóraǵasy Farhat Sársekeev.
Biryńǵaı front-ofıstiń tehnıkalyq iske qosylýy osy jylǵy aqpanda ótti. Osy ýaqyt ishinde konsýltanttar kásipkerlerdiń 30 myńǵa jýyq ótinishin qabyldaǵan. Front-ofıs arqyly 1 250 joba súıemeldenip, qarjylandyryldy.
Biryńǵaı front-ofıs bazasynda Bıznesti qoldaý jáne súıemeldeý ortalyqtary da pılottyq rejımde jumys isteýde. Olardyń mindeti – kásipkerlerge memlekettik organdarmen, qarjy ınstıtýttarymen jáne basqa da uıymdarmen ózara is-qımyldy talap etetin naqty máselelerdi sheshýge járdemdesý.
Ortalyq mamandary máseleni bastapqy taldaýdan ótkizip, ony sheshýdiń yqtımal jolyn anyqtaıdy. Qajet bolǵan jaǵdaıda jumysqa salalyq memlekettik organdar, qarjy ınstıtýttary, ákimdikter men «Báıterek» tobynyń uıymdary tartylady. Pılottyq joba Astana, Almaty, Shymkent qalalaryn, Soltústik Qazaqstan jáne Aqtóbe oblystaryn qamtýda.
— Mundaı qoldaýdyń barlyq óńirde bolýy mańyzdy. Biz kásipkerlerdi qoldaý tásilin neǵurlym tıimdi ete otyryp, «Іsker aımaq» baǵdarlamasyn aýyldarǵa taratýdy josparlap otyrmyz. Bul rette «Damý» qorynyń óńirlik fılıaldary men mobıldi front-ofısteri úlken ról atqarýy tıis. Konsýltanttardyń mindeti — bıznestiń qalyptasýy men damýynyń barlyq kezeńin súıemeldeý. Taǵy bir mańyzdy baǵyt – bıznesti qoldaý jáne súıemeldeý ortalyqtary. Kásipkerler problemalarmen jıi betpe-bet keledi. Biraq qaıda júginýdi, qalaı sheshýdi bilmeı jatady. Ortalyqtar osyny jolǵa qoıý úshin qurylýda. Ázirge olar elimizdiń bes óńirinde pılottyq rejımde jumys istep jatyr, — dep atap ótti Serik Jumanǵarın.
Buǵan deıin shaǵyn kásipkerliktiń orta bızneske óspeýiniń tórt sebebi aıtyldy.
