Kásipkerler áleýmettik jaýapkershilikke nazar aýdarýy kerek - Murat Ergeshbaev
ASTANA. KAZINFORM – Bıýdjet tapshylyǵy máselesi aıasynda asa shuǵyl emes jobalardy keıinge qaldyrýǵa bolady. Bul týraly Kazinform agenttiginiń BIZDIÑ ORTA podkasynda Májilis depýtaty Murat Ergeshbaev málim etti.
Onyń aıtýynsha, elimizde áleýmettik salaǵa bıýdjet qarajatynyń biraz bóligi bólinip keledi. Sonymen qatar, bul baǵytty qoldaý jalǵasa beredi.
- Shyǵyndardy azaıtý máselesine toqtalsaq, qazirgi kezde asa qajet emes, ıaǵnı keıinnen júzege asyrýǵa bolatyn jobalardy qysqartýǵa bolady. Máselen, túrli saýyqtyrý ári sport keshenderin, mádenıet úılerin jáne basqa da jobalardy ınvestorlar arqyly salǵyzýǵa ekpin qoıǵan jón. Bul turǵyda Qyzylorda oblysynda jaqsy tájirıbe bar, - dedi M. Ergeshbaev.
Osy oraıda ol iri kásipkerler áleýmettik jaýapkershilikke erekshe nazar aýdarýy kerek ekenin aıtty.
- Jańa ǵana Qyzylorda oblysyn atap óttim. Endi búkil elimizdiń aýmaǵynda osyǵan mán berýi tıis, - dedi depýtat.
Eske salsaq, jaqyn arada Parlament Májilisi Qazaqstan Úkimetiniń jáne QR Joǵary aýdıtorlyq palatasynyń 2024 jylǵy respýblıkalyq bıýdjettiń atqarylýy týraly esepterin talqylaıdy.