Kásipkerler AQSh-taǵy kelisimder týraly: Qazaqstan úshin revolıýtsııalyq qadam
ASTANA. KAZINFORM — AQSh-tyń isker toptarymen ótken kezdesý Qazaqstan úshin jańa múmkindikterge jol ashty. Bul týraly «C5+1» formatyndaǵy yntymaqtastyqtyń on jyldyǵyna arnalǵan bıznes-konferentsııa qatysýshylary aıtty, dep habarlaıdy Kazinform agenttiginiń menshikti tilshisi.
«KAZAKH INVEST» ulttyq kompanııasynyń AQSh-taǵy ókili Marat Birimjan Qazaqstan Prezıdentiniń qatysýymen ótken S5+1 sammıti aıasyndaǵy iskerlik kezdesýdiń mańyzdylyǵyn jiktep berdi.
— Osy aptada Qazaqstan men Amerıka Qurama Shtattary arasyndaǵy strategııalyq ekonomıkalyq yntymaqtastyqty damytýda mańyzdy oqıǵa boldy. Qazaqstan Prezıdenti Qasym-Jomart Toqaevtyń Vashıngtonǵa resmı sapary barysynda jalpy quny 17,2 mıllıard AQSh dollary bolatyn 30-dan astam kelisimge qol qoıyldy, — dedi Marat Birimjan.
Onyń aıtýynsha, amerıkalyq jetekshi kompanııalarmen jasalǵan bul kelisimder Qazaqstan men AQSh arasyndaǵy strategııalyq áriptestikti keńeıtý jolyndaǵy mańyzdy qadam. Qol qoıylǵan qujattar tehnologııa, avıatsııa, bilim berý jáne mańyzdy mıneraldar salalaryn qamtyp, yntymaqtastyqtyń jańa sapaly kezeńine jol ashady, bul jaı ınvestıtsııa ǵana emes, álemdik deńgeıdegi jobalardy birlesip ázirleý.
— 17,2 mıllıard dollar aıtarlyqtaı kórsetkish, biraq biz ony tek bastaýy ǵana dep qabyldaımyz. Bizdiń maqsat — ınvestıtsııalar tehnologııalar transferine, óndiris qurýǵa, eksporttyq áleýetti arttyrýǵa jáne Qazaqstannyń jahandyq naryqtaǵy básekege qabilettiligin nyǵaıtýǵa yqpal etetin ekojúıe qalyptastyrý. Sonymen qatar, biz barlyq qatysýshy úshin barynsha ashyq ári qolaıly bıznes-ortany qamtamasyz etýdi kózdep otyrmyz: alań tańdaý men ınvestıtsııalyq jeńildikter berýden bastap, jobanyń barlyq kezeńinde súıemeldeýge daıynbyz. Aldaǵy aılarda «Kazakh Invest» amerıkalyq seriktestermen naqty jol kartalary boıynsha jumysyn jalǵastyryp, qol qoıylǵan kelisimderdiń naqty jobalarǵa aınalýyna jáne eki el ekonomıkasyna naqty paıda ákelýine kúsh salady, — dedi Marat Birimjan.
«VEON» JShS «Kar-Tel» kompanııasynyń atqarýshy dırektory (Beeline Qazaqstannyń bas dırektory) Evgenıı Nastradın amerıkalyq SpaceX kompanııasymen uıaly baılanys qyzmetterin usyný jónindegi kelisimge qol jetkizilgenin habarlady.
— VEON/Beeline Qazaqstan men SpaceX kompanııasy arasyndaǵy kelisimge qol qoıylǵanyn qýana jarııalaımyn. Bul Qazaqstanǵa baılanys múlde joq aımaqtardy spýtnıktik tehnologııa arqyly qamtýdyń múmkindigi. Jerústi jáne spýtnıktik baılanys biriktirilgen gıbrıdti qamtý júıesin iske qosamyz. Bul degenimiz qazir uıaly baılanys pen ınternet bolmaǵan óńirlerde jaqyn arada baılanys jelisi paıda bolady. Bul Qazaqstan úshin revolıýtsııalyq qadam. Osy tehnologııa iske qosylǵannan keıin elimizdiń barlyq aýmaǵy qamtylady. Pılottyq iske qosý osy qarashada bastalady. Al keler jyl basynan qyzmet kezeń-kezeńimen iske qosylady, aldymen SMS-habarlamalar, keıin jeńil derekter qyzmeti (light data) usynylady, ár toqsan saıyn jańa qyzmet túrleri qosylyp otyrady, — dedi Evgenıı Nastradın.
Jańa tehnologııa telefonnan tikeleı spýtnıkke qosylýǵa múmkindik beredi, bul óz kezeginde gıbrıdti sheshim usynýǵa jáne klıentterdiń únemi baılanysta bolýyn qamtamasyz etýge jol ashady.
Sondaı-aq, Educational Testing Service (ETS) kompanııasynyń bas atqarýshy dırektory Amıt Sevak Qazaqstanmen bolashaqtaǵy yntymaqtastyq týraly kózqarasyn bildirdi.
— Búgin Qazaqstan Respýblıkasynyń Ǵylym jáne joǵary bilim mınıstrligimen kelisimge qol qoıylǵanyn qýana habarlaımyn. Biz úshin bul bilim berý salasyndaǵy jetistikterdi baǵalaýǵa kómektesetin strategııalyq seriktes retinde tańdalý úlken mártebe. Uzaq merzimdi strategııalyq yntymaqtastyqty asyǵa kútemiz, — dedi Amıt Sevak.
Atalǵan kompanııa bilim berý testterin ázirleýmen aınalysady, aldymen Qazaqstandaǵy qajettilikti zerttep, keıin ózderiniń eń úzdik zertteý sheshimderiniń keıbirin engizý múmkindigin qarastyrady.
Cointelegraph kompanııasynyń bıznes pen seriktestik qatynasty damytý bóliminiń basshysy Djeffrı Mıllıgan Cointelegraph pen Qazaqstan Respýblıkasynyń Jasandy ıntellekt jáne tsıfrlyq damý mınıstrligi arasynda ózara túsinistik týraly kelisilgen memorandýmnyń mańyzyna toqtaldy.
— Qazaqstan — óńirdegi tehnologııalyq ortalyq. Cointelegraph platformasy qazaqstandyq komandalardyń tsıfrlyq aıasyn keńeıtýge jáne búkil álem boıynsha Web 3 blokcheın tehnologııalaryn paıdalanýǵa kómektesedi. Qazaqstanmen birlese otyryp, túrli memlekettik mekemeler men jeke sektorǵa bilim berý turǵysynan qoldaý kórsetemiz, — dedi Djeffrı Mıllıgan.
Tehnologııalyq kompanııanyń ókili atap ótkendeı, memorandým aıasynda aldaǵy birneshe aı ishinde naqty jumysqa kirisedi.
— Qazaqstannyń tsıfrlyq veb-tehnologııalar, blokcheın jáne fınteh baǵytyndaǵy barlyq jetistigin álemge tanystyrý joldaryn zertteý boıynsha birlesken birneshe zertteý jobasyn iske asyramyz. Bul el deńgeıinde qoldaý kórsetýge arnalǵan alǵashqy bastamamyz emes, biraq mınıstrlik komandasymen jumys isteýimiz alǵashqy tájirıbemiz, — dep bólisti Djeffrı Mıllıgan.
Sondaı-aq, Freedom Holding Corp. kompanııasynyń bas dırektory Tımýr Týrlov NVIDIA kompanııasymen yntymaqtastyq týraly kelisimge qol qoıylǵanyn aıtty.
— Kompanııamyz úshin eń mańyzdy kelisimderdiń birine qol qoıdyq. Bul qujat NVIDIA kompanııasymen Qazaqstanda jasandy ıntellekt (AI) esepteýlerine arnalǵan ulttyq klasterdi salý jónindegi, shamamen 2 mlrd AQSh dollaryna baǵalanǵan joba. Bul búkil Ortalyq Azııa óńiri úshin mańyzdy bastama, — dedi Tımýr Týrlov.
Onyń aıtýynsha, joba óńirdegi eń iri jasandy ıntellekt klasteri bolady jáne AI tehnologııalaryn engizýdiń basty qozǵaýshy kúshi bolmaq.
Sondaı-aq ulttyq AI úlgilerin damytýǵa, Qazaqstannyń bulttyq esepteý boıynsha IT-qyzmetter boıynsha eń iri eksporttaýshy elge aınalýyna múmkindik beredi.
— Klaster bolashaqta búkil Ortalyq Azııa naryǵyn qamtyp, jahandyq deńgeıge shyǵýǵa jol ashady. Meniń oıymsha, atalǵan bastama elimizdiń IT-ındýstrııasynda joǵary bilikti jumys oryndarynyń kóbeıýine zor serpin beredi, — dep túıindedi Tımýr Týrlov.
Aıta keteıik, Kazinform agenttiginiń analıtkalyq sholýshysy Prezıdenttiń AQSh-qa sapar nátıjesine zer salyp, sarapshylardan mán-jaıyn bildi.