Kásipkerler 1 naýryzǵa deıin salyq rejımin tańdaýy qajet — Komıtet
ASTANA. KAZINFORM — Ońaılatylǵan deklaratsııa negizindegi arnaýly salyq rejımin qoldanǵysy kelgen kásipkerler 1 naýryzǵa deıin salyq rejımi týraly habarlama jiberýi qajet.
Bıyl kúshine engen jańa Salyq kodeksi arnaıy salyq rejımderi sanyn úshke deıin qysqartqan edi. Endi árqaısysynyń logıkasy túsinikti: ózin-ózi jumyspen qamtyǵandarǵa — bólek rejım, shaǵyn bızneske — ońaılatylǵan deklaratsııa jáne fermerlerge — bólek salyq rejımi qoldanylady.
Ásirese ońaılatylǵan deklaratsııa shaǵyn jáne orta kásiptiń basty rejımine aınaldy. Ol jyldyq tabysy 2,5 mlrd teńgege deıingi shaǵyn bızneske arnalǵan jáne salyqty jylyna eki ret tóleýge múmkindik beredi.
— Endi Salyq kodeksiniń 840-babyna sáıkes, kásipkerler ózine qaı rejım sáıkes keletinin anyqtap, 2026 jylǵy 1 naýryzǵa deıin tıisti habarlama tapsyrýy kerek. Bul tek ońaılatylǵan deklaratsııa rejımin qoldanatyndarǵa baılanysty. Eger 1 naýryzǵa deıin habarlama joldanbasa, salyq tóleýshiler arnaýly salyq jeńildikterinen aıyrylyp, jalpyǵa birdeı belgilengen salyq rejımine ótedi, — dedi Memlekettik kirister komıteti Arnaýly salyq rejımderin ákimshilendirý basqarmasynyń basshysy Erqanat Shynbergen elordada ótken brıfıngte.
Al Ózin-ózi jumyspen qamtyǵandarǵa esh habarlama jiberýdiń qajeti joq, olar tek mobıldi qosymshany qoldanyp, chek berýi tıis. Buryn patent negizinde nemese mobıldi qosymsha arqyly arnaýly salyq rejımin qoldanǵandar avtomatty túrde eseptep shyǵarylyp, ózin-ózi jumyspen qamtyǵandar rejımine aýystyrylady. Olardyń rejımdi qoldaný kúni — chek berilgen birinshi kúnnen bastalady. Fermerler de avtomatty túrde tıisti rejımge aýystyrylady.
Habarlama jiberýdiń birneshe joly bar:
— Salyq tóleýshi kabıneti arqyly;
— «E-Salyq Business» arnaýly mobıldi qosymshasy arqyly;
— ornalasqan jeri boıynsha Memlekettik kirister basqarmasyna qaǵaz túrinde;
— bankterdiń mobıldi qosymshalary arqyly.
Sondaı-aq, 2025 jyly salyq rejımin tańdaǵandar da qaıtadan habarlandyrý jiberýi qajet. Sebebi habarlamany 2026 jylǵy 1 qańtardan bastap berý qajet bolǵan.
— Keıbir salyq tóleýshiler mundaı habarlamalardy Jańa jylǵa deıin bergen, alaıda Salyq kodeksine sáıkes bul habarlama 2026 jylǵy 1 qańtardan bastap berilýi tıis. Osy azamattarǵa biz qaıtadan habarlama tapsyrýǵa múmkindik berdik. Tıisinshe, olar 1 naýryzǵa deıin salyq salý rejımin tańdaý týraly habarlamany qaıta tapsyrý kerek, — dedi E. Shynbergen.
Búgingi tańda 450 myńǵa jýyq habarlama joldanyp, tıisti rejımdi tańdady. Bul jumys kúndelikti júrgizilip jatyr.
— Arnaýly salyq rejımderi eń aldymen mıkro jáne shaǵyn bıznes ókilderine baǵyttalǵan. Bul rejım 2001 jyldan bastap bar jáne jańadan kásip bastaǵan azamattardy qoldaý maqsatynda engizilgen. Árıne bul rejımdi kóp azamat qoldanady. Onyń aıasynda salyqty tóleý ońaı, jalpy túsimderden 3-4 paıyz, keı jerlerde 2 paıyz salyq tólenedi, býhgalterlik esep júrgizý talap etilmeıdi. Jarty jylda bir ret ońaılatylǵan deklaratsııa tapsyryp, mindettemelerdi oryndaý jetkilikti, — deıdi komıtet ókili.
Buǵan deıin 2026 jyldyń 1 qańtarynda kúshine engen jańa Salyq kodeksiniń negizgi ózgeristerin túsindirgen edik.