Kásipkerge jumys istetpegen Prıozersk polıtsııasynyń basshysy qyzmetinen qýyldy

QARAǴANDY. KAZINFORM – Qaraǵandy oblysy Prıozersk prokýrory áleýmettik jelilerdi monıtorıngteý barysynda qalalyq polıtsııa bólimi bastyǵynyń meıramhana ákimshisin baqylaýshy-qadaǵalaýshy organdardyń tekserýimen qorqytqanyn anyqtady.

Quzyrly organ ókili Jańa jyl qarsańynda kásipkerge telefon shalyp, merekede jumys isteýge tyıym salý týraly eskertken. Áńgimeniń beınejazbasy áleýmettik jelide tarap ketken. 

«Tekserý nátıjesinde Qazaqstan Respýblıkasy Konstıtýtsııasynyń kásipkerlik qyzmetpen aınalysý erkindigine kepildik beriletini týraly 26-babynyń talaptaryn buzý faktisi tirkeldi. Atalǵan fakti boıynsha Qaraǵandy oblysynyń prokýratýrasy qadaǵalaý aktisin engizdi.

Nátıjesinde Tártiptik komıssııa Prıozersk qalasy polıtsııa bóliminiń bastyǵyn atqaratyn qyzmetinen bosatý týraly sheshim qabyldady. Qazirgi ýaqytta tıisti materıaldar QR ІІM-ge joldandy», — delingen baqylaýshy organnyń málimetinde.

Sonymen qatar, atalǵan polıtsııa bóliminiń 5 laýazymdy tulǵasy qatań tártiptik jaýapkershilikke tartylǵan.