Kásipkerden aqsha talap etken blogerge úkim shyqty
TALDYQORǴAN. KAZINFORM – Jetisý oblysy Qaratal aýdandyq sotynda asa iri kólemde aqsha bopsalaýǵa qatysty qylmystyq is qaraldy. Bul týraly Jetisý oblystyq sotynyń baspasóz qyzmeti habarlady.
Sot materıaldaryna sáıkes, 2024 jyldyń qarasha aıynda Qaratal aýdanynyń turǵyny Dmıtrıı Perlov qylmystyq nıetpen kásipker K.-dan 10 mln teńge talap etken. Ol óziniń Instagram jelisindegi «ZohanTV» paraqshasynda (29 myńnan astam oqyrmany bar) Karatal aýdanyndaǵy qurylys sapasyna qatysty jarııalanǵan beınematerıaldardy óshirý úshin aqsha suraǵan. Sondaı-aq kásipkerdiń iskerlik bedeline nuqsan keltirýi múmkin basqa da materıaldardy taratamyn dep qorqytqan.
Aqsha berý sátinde Dmıtrıı Perlov quqyq qorǵaý organdarynyń qyzmetkerlerimen ustalǵan.
Memlekettik aıyptaýshy sottalýshyny kináli dep tanyp, oǵan 6 jyl 8 aıǵa bas bostandyǵynan aıyrý jazasyn taǵaıyndaýdy suraǵan. Jábirlenýshi prokýror usynǵan jazaǵa kelisip, sonymen qatar moraldyq jáne materıaldyq shyǵyndy óndirý jóninde azamattyq talap qoıǵan. Qorǵaýshy tarap óz kezeginde aıyptalýshynyń kinásiz ekenin málimdep, aqtaý úkimin shyǵarýdy surady. Sondaı-aq sottalýshy óz kinásin moıyndamady.
– Sot otyrysynda jábirlenýshi men kýálardyń aıǵaqtary jáne basqa da qylmystyq is materıaldary negizinde sottalýshynyń kinási dáleldendi. Jaza taǵaıyndaý kezinde sot istiń mán-jaılaryn, qylmystyń qoǵamǵa qaýiptilik dárejesin, sottalýshynyń jeke basyn jáne onyń quqyq buzýshylyqqa deıingi jáne keıingi minez-qulqyn eskerdi. Jaza men jaýapkershilikti jeńildetetin mán-jaı retinde sottalýshynyń kámeletke tolmaǵan balalarynyń baryn nazarǵa aldy. Aýyrlatatyn mán-jaılar anyqtalǵan joq, - delingen habarlamada.
Sot úkimimen Dmıtrıı Perlov Qylmystyq kodekstiń 194-baby 3-bóligi 2-tarmaǵy boıynsha kináli dep tanylyp, oǵan ortasha qaýipsizdik mekemesinde jazasyn óteý úshin 6 jyl merzimge bas bostandyǵynan aıyrý jazasy taǵaıyndaldy.
Sot azamattyq talapty ishinara qanaǵattandyryp, jábirlenýshiniń paıdasyna 350 myń teńge óndirý týraly sheshim shyǵardy.
Aıta keteıik, úkim zańdy kúshine engen joq.
Buǵan deıin, Sherzat Polat isi boıynsha aıyptalýshylarǵa qandaı jaza taǵaıyndalǵanyn jazǵanbyz.