Kásipkerdi asa qatygezdikpen óltirgen kúdikti Reseıde ustalyp, elge qaıtaryldy

ASTANA. KAZINFORM — QR Bas prokýratýrasynyń qyzmetkerleri pavlodarlyq kásipkerdi óltirdi degen kúdikpen Qazaqstan azamatyn Reseı Federatsııasynan ekstradıtsııalady, dep habarlaıdy vedomstvonyń baspasóz qyzmeti.

Bıylǵy jyldyń 21 aqpanynda jábirlenýshi jumysqa ketip, keıin baılanysqa shyǵýyn toqtatqan, osyǵan baılanysty ol habar-osharsyz joǵalǵan dep tanylǵan. Sotqa deıingi tergep-tekserý barysynda sol kúni kásipkerdiń Pavlodarda kúdiktimen onyń turǵyn úıiniń aýlasynda kezdeskeni anyqtaldy. Qarjylyq kelispeýshilikterge baılanysty olardyń arasynda janjal týyndap, qaskúnem jábirlenýshiniń keýdesi men betine 22 ret pyshaq suqqan. Jábirlenýshi sol jerde alǵan jaraqattarynan kóz jumǵan. Qylmystyń izin jasyrý maqsatynda kúdikti marqumnyń denesin jáne onyń avtokóligin garajyna jasyryp, keıin Qazaqstannan shyǵyp, shetelge qashyp ketken.

— Osy jyldyń naýryz aıynda ol Reseı Federatsııasynyń aýmaǵynda ustalyp, Qazaqstan Respýblıkasy Bas prokýratýrasynyń suraýy boıynsha eline ekstradıtsııalandy. Qazirgi ýaqytta kúdikti tergeý ızolıatoryna qamaldy. Oǵan aıyp taǵylǵan qylmys boıynsha 8 jyldan 15 jylǵa deıingi merzimge bas bostandyǵynan aıyrý túrindegi jaza kózdelgen, — delingen habarlamada.

Budan buryn júk kólikterin zańsyz tirkeýmen aınalysqan toptyń sybaılasy Reseıden ekstradıtsııalanǵany belgili boldy.