Kásipker dándi daqyldy jymqyrǵanyn jasyryp-jabý úshin $350 myń para bermek boldy

ASTANA. KAZINFORM — Antıkor birneshe óńirde alaıaqtyq faktilerine sot úkimi shyqqanyn habarlady. 

Máselen, Astana qalasynyń qylmystyq ister jónindegi mamandandyrylǵan aýdanaralyq soty 8 jyl 6 aıǵa bas bostandyǵynan aıyrýǵa «№ 2 jáne № 5 nan bazasy» «Astyq qoımalary» JShS ókildikteriniń burynǵy dırektory M. Júsipov sottaldy.

Ol memlekettik organdardyń laýazymdy adamdaryna asa iri mólsherde dándi daqyldardy jymqyrý faktisi boıynsha qylmystyq jaýapkershilikten jaltarý úshin 350 myń AQSh dollary somasynda para berdi degen kúdikke ilindi.

Osy úkimmen para berýge ıtermelegeni jáne alaıaqtyqqa oqtalǵany úshin I. Barabash pen T. Demesinov árqaısysy 10 jylǵa bas bostandyǵynan aıyryldy.

Sonymen qatar Qostanaı qalasy № 2 sotynyń úkimimen Qostanaı advokattar alqasynyń advokaty O. V. Brantsevke qatysty úkim jarııalandy.

Ol alaıaqtyq pen para berýge ıtermeleýge oqtalǵany úshin kináli dep tanyldy.

O. V. Brantsev quqyq qorǵaý organdarynyń laýazymdy adamdaryna qylmystyq jaýaptylyqtan jaltarý úshin para berý syltaýymen óziniń qorǵaýshysy A. K. Sansyzbaevtyń 600 myń teńge mólsherindegi aqshasyn zańsyz ıemdengen.

Oǵan paranyń 20 eselengen somasy 12 mln teńge mólsherinde aıyppul túrinde jaza taǵaıyndalyp, memlekettik qyzmette qyzmet atqarýǵa ómir boıyna tyıym salyndy.

Úkimder zańdy kúshine engen joq.

Para berýshiler men paraqorlyqtaǵy deldaldar para alýshylarmen qatar shartty túrde merziminen buryn bosatý múmkindiginen aıyrylǵan.

Para bergeni úshin 15 jylǵa deıin bas bostandyǵynan aıyrý, sondaı-aq múlikti tárkileý, belgili bir laýazymdardy atqarý quqyǵynan ómir boıy aıyrý, áskerı ataqtardan, synyptyq shenderden, memlekettik nagradalardan jáne t. b. aıyrý kózdelgen.

Azamat quqyq qorǵaý organyna óz erkimen habarlaǵan nemese oǵan qatysty bopsalaý oryn alǵan jaǵdaıda ǵana para bergeni úshin qylmystyq jaýaptan bosatylady.

Barlyq basqa jaǵdaılarda para berýshi qylmystyq jazaǵa tartylady.

Óz kezeginde jemqorlyq faktisi týraly habarlaǵan nemese jemqorlyqqa qarsy is-qımylǵa ózge de jolmen járdem kórsetetin adamdarǵa birjolǵy aqshalaı syıaqy tólenetinin eske salamyz.