Kásipker áıelderge bıznesti damytý joldary úıretildi

ALMATY. KAZINFORM – Eýropalyq qaıta qurý jáne damý banki (EQDB) Qazaqstan Úkimetiniń qoldaýymen «Áıelder mıkrobızneste» oqytý baǵdarlamasyna qatysýǵa ótinim qabyldaýdy bastady. Bul joba bıznesin damytýǵa umtylatyn jáne ártúrli áleýmettik nemese ekonomıkalyq kedergilerge tap bolatyn kásipkerler úshin arnaıy jasalǵan. 

Qazaqstandaǵy EQDB shaǵyn jáne orta bıznesti damytý baǵdarlamasynyń basshysy Alma Qasymovanyń aıtýynsha, Qazaqstandaǵy shaǵyn jáne orta bıznes sektoryndaǵy kásiporyndardyń 49%-yn áıelder basqarady. Alaıda, orta jáne iri bızneste olardyń úlesi aıtarlyqtaı tómen – sáıkesinshe 36% jáne 19%. 

«Bizdiń basty maqsatymyz, mıssııamyz – qoljetimdi jáne sapaly oqytý arqyly áıelder basqaratyn shaǵyn kásiporyndarǵa ósý múmkindigin berý», - dep atap ótti Alma Qasymova.

Oqytý qazaq jáne orys tilderinde onlaın-formatta 5 aı boıy ótedi. Qatysýshylar oqýdy kez kelgen ýaqytta baǵdarlama aıasynda bastaı alady. Kýrs bıznestiń negizgi aspektilerin qamtıtyn 6 modýlden turady: marketıng, satý, qarjy, jeke basqarý, operatsııalyq basqarý, strategııa, avtomattandyrý jáne jasandy ıntellekt. 

Atalmysh baǵdarlama Qazaqstanda úshinshi ret ótkizilip jatyr. Aldyńǵy jobalar 1 500-ge jýyq kásipker áıelge óz daǵdylaryn nyǵaıtýǵa jáne bıznesterin jaqsartýǵa múmkindik berdi. 

Jobany «Dıalog» trenıng jáne konsaltıng kompanııasy júzege asyrady.

«Baǵdarlamaǵa ótinimderdi qabyldaý qazirgi ýaqytta ashyq jáne biz óz kásiporyndaryn damytqysy keletin áıelderdi bastamaǵa qosylýǵa jáne jańa bilim men daǵdylardy ıgerý múmkindigin paıdalanýǵa shaqyramyz. Tirkelý jáne tolyq aqparat platforma saıtynda, - dedi spıker.