Kásipker Ánýarbek Jeksenǵalıev 6 jyl 8 aıǵa sottaldy
ASTANA. KAZINFORM – Urlanǵan qarajatty zańdy aınalymǵa tartqan Ánýarbek Jeksenǵalıev múlki tárkilenip, 6 jylǵa jáne 8 aıǵa bas bostandyǵynan aıyryldy.
Qarjylyq monıtorıng agenttiginiń málimetinshe, qylmystyq tabys somasy – 4,3 mlrd teńge. Ótkizilgen paralleldi qarjylyq tergeý nátıjesinde qylmystyq aktıvterdi jylystatýdyń kúrdeli shemasy zertteldi. Jeksenǵalıev memlekettik bıýdjettiń 1,1 mlrd teńgesin jymqyryp, ony baqylaýyndaǵy jalǵan qurylǵan kásiporyndardyń shottaryna aýdarý jolymen zańdastyrǵany anyqtaldy.
Sonymen qatar ol qarajatty alyp, shetel valıýtasyna aıyrbastaý boıynsha qarjylyq operatsııalardy júzege asyrǵan. Ol sondaı-aq urlanǵan qarajatty jylystatý úshin jyljymaıtyn múlikpen jalǵan mámileler jasaǵan.
Qylmystyq kiristerdi zańdastyrý jáne jylystatý áreketteri 2019-2022 jyldar aralyǵynda iske asyryldy. Ol jer telimderin satyp alyp, qurylys kompanııalaryna ótkizip, paıdalanýǵa berilgen úılerden syıaqy retinde páterlerdi alyp otyrǵan. Jeksenǵalıevten memleket kirisine tárkilengen múliktiń somasy 4,7 mlrd teńge.
«Eger siz ókilettikterdi teris paıdalaný, qarajatty jymqyrý nemese basqa da ekonomıkalyq quqyq buzýshylyqtar faktileri jaıly bilseńiz, «AFM Insider» telegram botyna habarlaýyńyzdy suraımyz. Anonımdilikke kepildik beriledi», - delingen habarlamada.
