Kásipker, 5 balanyń anasy: Ár aýylda qoı júninen kórpe, jastyq tigetin shaǵyn oryndar bolǵany durys

ORAL. KAZINFORM — Aýyldarda qoı júniniń bosqa rásýa bolyp jatatyny jóninde jıi aıtylady. Osy oraıda qoı júnin qadege jaratýdyń joldary qandaı? Mine, osy oraıda Oralda ótkizilgen «AUYL FEST. Qoı sharýashylyǵy – 2025» tuńǵysh halyqaralyq forýmyna qatysqan Aqmola oblysy Aqkól aýdany Eńbek aýylynyń turǵyny, «Nurǵalıeva J.B.» JK dırektory Juma Nurǵalıeva óz oı-pikirimen bólisti.

Juma Bekbolatqyzynyń Kazinform tilshisine málim etkenindeı, jastar qalaǵa ketip jatsa, ózi otbasymen Astanadan aýylǵa kóship barǵan.

Onyń sózine qaraǵanda, jer alyp, úı salǵan. Sodan keıin baý-baqsha ósirip, mal sharýashylyǵymen aınalysqan.

- Mine, osyndaı kezde qoı júnin dalaǵa laqtyryp tastaýǵa týra keletin. Muny qalaı paıdaǵa asyrýǵa bolatynyn oılandym. Sodan keıin kórpe, jastyq tigýge bekindim. Halyqtyq qolónerge, ǵalamtordan alynǵan aqparattarǵa súıenip, jumys isteı bastadym. Bastapqyda qolmen tigý qıynǵa tústi. Keıin «Aýyl amanaty» jobasy aıasynda 9 mln teńgege qajetti jabdyqtarǵa qol jetkizip, jumysty óndiristik negizde jolǵa qoıdym. Buǵan «Aýyl» partııasy, Aqmola oblysy ákimdigi jáne «Kókshe» áleýmettik-kásipkerlik korporatsııasy qoldaý kórsetkenin aıta ketkim keledi, - deıdi J.Nurǵalıeva.

Onyń aıtýynsha, merınos qoıynyń júninen tigilgen toqyma ónimderi ótimdi bolǵandyqtan, Astana qalasynan da arnaıy oryn ashqan. Qazirgi kezde óz otbasynan bólek Astanada 3, aýylda 3 adam nápaqasyn osydan taýyp júr. 

«Mal ósirseń, qoı ósir, tabysy onyń kól-kósir» demekshi, qarshadaıynan eńbekpen kózin ashqan balalary er jetip qalǵan. Qoı satyp, sonyń qarjysyna shetelge baryp, aǵylshyn tilin úırenip alǵan.

Búgingi tańda «Táji» brendi Qazaqstan ǵana emes, shet elde de tanymal bola bastady. Tapsyrystar Qytaı, Chehııa, Italııa elderinen túsip jatyr. 

- Ǵalymdardyń zertteýi negizinde qara qoıdyń júninen bıologııalyq tyńaıtqyshtar óndirýdi oılastyrýdamyz. Menińshe, Qazaqstannyń ár aýylynda osyndaı shaǵyn óndiris oryndary bolsa, artyqtyq etpeıdi. Óıtkeni táýekeli azdaý. Úlken kásiporyn bolsa, shıkizat jetispeı, tuıyqqa tirelýi múmkin. Sondyqtan ata-baba dástúrin jańarta otyryp, tabıǵı ónimderge betburys jasaýymyz kerek, - dep qosty J.Nurǵalıeva.

Eske sala keteıik, budan buryn Qazaqstanda qoı sharýashylyǵyn qalaı damytýǵa bolatynyn jazǵan edik.