Kaspııge týǵan kúnin toılaýǵa ketken jigitti izdeý jumystary jalǵasyp jatyr
AQTAÝ. KAZINFORM – Kaspıı teńizinde joǵalyp ketken 18 jastaǵy jigitti izdestirý-qutqarý jumystary ekinshi kúnge ulasty. Oǵan Tótenshe jaǵdaılar mınıstrligi, Áskerı-teńiz kúshteri men UQK Shekara qyzmetiniń bólimsheleri jumyldyryldy.
Aldyn ala málimet boıynsha, izdeýdegi azamat 7 shilde kúni 18 jasyn teńiz jaǵasynda toılamaqqa barǵan.
Mańǵystaý oblystyq tótenshe jaǵdaılar departamentiniń málimetinshe, izdestirý jumystary Kaspıı teńiziniń akvatorııasynda júrgizilýde. Qutqarý operatsııasyna Qazaqstan Tótenshe jaǵdaılar mınıstrliginiń bólimshelerimen qatar, Áskerı-teńiz kúshteri, Ulttyq qaýipsizdik komıteti Shekara qyzmetiniń qyzmetkerleri jáne ózge de kúshtik qurylymdardyń mamandary jumyldyrylǵan.
- Jalpy izdestirý-qutqarý jumystaryna 53 adam, 6 tehnıka jáne 8 ushqyshsyz ushý apparaty tartylǵan. Qazirgi ýaqytta joǵalǵan azamatty izdeý jumysy jalǵasyp jatyr,-dep málimdedi departamenttiń baspasóz qyzmeti.
Buǵan deıin 6 shildede Kaspıı teńiziniń shomylýǵa jabdyqtalmaǵan jaǵalaýynda eki adam sýǵa batyp ketken edi.
