Kaspııdiń taıazdanýyn tejeý úshin qandaı jumystar júrgizilip jatyr
ASTANA. KAZINFORM — Kaspıı teńizindegi sý deńgeıiniń aýytqýyn zertteıtin sarapshylardyń jumys tobyna Qazaqstan tarapynan qatysatyn quram jasaqtalyp jatyr.
Bul týraly Kazinform saýalyna QR Sý resýrstary jáne ırrıgatsııa mınıstrliginiń resmı jaýabynda aıtyldy.
Vedomstvo málimetinshe, Kaspııdegi ahýaldy jaǵasyndaǵy memleketter jiti qadaǵalap otyr.
— Kaspıı teńizindegi sý kólemi men qalypty jaǵdaıy Kaspıı mańy memleketteriniń baqylaýynda. Jaǵdaı Kaspıı teńizin qorǵaý jónindegi negizdemelik konventsııa (Tegeran konventsııasy) sheńberindegi sammıtter men otyrystarda qaralady. Tegeran konventsııasynyń taraptary — Qazaqstan Respýblıkasy, Ázerbaıjan Respýblıkasy, Iran Islam Respýblıkasy, Reseı Federatsııasy jáne Túrikmenstan. 2024 jylǵy 18 qarashada Baký qalasynda SOR29 sammıti aıasynda Ázerbaıjan tarapynyń tóraǵalyǵymen «Klımattyń ózgerýi jaǵdaıynda Kaspıı teńizi deńgeıiniń tómendeýi» taqyrybynda is-shara ótti. Talqylaý barysynda Kaspıı teńizi deńgeıiniń tómendeý máselesin shuǵyl sheshý, ekologııalyq daǵdarystyń saldaryn jeńildetýge arnalǵan tıimdi jol kartasyn ázirleý jáne iske asyrý úshin BUU júıesi aıasynda óńirlik yntymaqtastyqty keńeıtip, seriktestik qatynastardy nyǵaıtý sııaqty tujyrymdar jasaldy, — delingen habarlamada.
Sondaı-aq Ázerbaıjan tarapynyń bastamasymen Kaspıı teńiziniń taıazdanýy máselesin kásibı mamandarmen birge talqylaý máselesi kóterilgen.
— Kaspıı teńiziniń taıazdanýy boıynsha besjaqty formatta talqylaýdy Kaspıı teńizi sý deńgeıiniń aýytqýyn zertteý boıynsha sarapshylar jumys tobynyń alańynda júrgizý usynyldy. Qazirgi ýaqytta Qazaqstan tarapynan osy jumys tobyna qatysatyn quram qalyptastyrylýda. Sondaı-aq, bul máseleler ulttyq deńgeıde «Kaspıı teńiziniń Qazaq ǵylymı-zertteý ınstıtýty» arqyly qajetti mamandar men sarapshylardy tarta otyryp, qarastyrylatyn bolady, — delingen jaýapta.
Mamandar Kaspıı sýy 2006 jyldan beri 2 metrdeı tómendegenin aıtady. Oǵan Edil jáne Jaıyq ózenderiniń joǵarǵy aǵystarynda salynǵan sý qoımalarynyń áseri bary aıtylyp júr. Sondyqtan da bul 5 memleket birlese otyryp talqylaıtyn, sheshetin másele.
Eske sala keteıik, buǵan deıin Kaspıı teńizi jaǵalaýdan alystap bara jatqany týraly jazǵan edik.