Kaspııdiń taıazdanýy máselesi qalaı sheshiledi – Nurlan Noǵaev

Mańǵystaý oblysynyń ákimi Nurlan Noǵaev elordada eseptik brıfıngte Kaspıı teńiziniń tartylýynyń sebepteri men sheshý joldaryn aıtty, dep habarlaıdy Kazinform.

«Sý qorlarynyń tartylýyn álemdik úrdis dep esepteımiz. Baıqap qarasańyzdar, basqa elderde de sarqyrap jatqan ózen-kólder tartylyp, keýip jatyr. Sonyń áseri bizge de tıip otyr. Kaspıı teńizi de qazir taıazdap barady. Osyny eskere otyryp, Memleket basshysy Kaspıı teńiziniń problemalarymen aınalysatyn ǵylymı-zertteý ınstıtýyn qurý jóninde tapsyrma berdi. Bul ınstıtýt Sý resýrstary mınıstrligi janynan quryldy. Kaspııdiń taıazdanýy teńiz jaǵasynda turatyn mańǵystaýlyqtardy ǵana emes, búkil Qazaqstandy tolǵandyrady», - dedi N.Noǵaev Ortalyq kommýnıkatsııalar qyzmetinde.

Oblys ákimi bul máseleniń ǵylymı negizben sheshilýin qamtamasyz etetinin jáne onymen arnaıy ınstıtýt aınalysatynyn jetkizdi.

«Halyqaralyq deńgeıde atqarylyp jatqan ister men qabyldanǵan sharalar, quqyqtyq-normatıvtik aktiler qabyldaý jónindegi máseleler jáne Kaspıı teńizindegi janýarlardy, balyqtardy jáne basqa da flora men faýnany saqtaý máselelerimen tyńǵylyqty osy ınstıtýt aınalysady. Bul ýaqyttyń enshisindegi másele», - deıdi óńir basshysy.

Buǵan deıin Nurlan Noǵaev «Qoshqar ata» qaldyq qoımasynyń qazirgi jaı-kúıi týraly, onyń jobalyq-smetalyq qujattamasynyń qaıta qaralyp jatqany týraly baıandaǵan edi.