Kaspııdiń sý qoryn saqtaý úshin jedel sharalardy birlese qabyldaý kerek — Prezıdent
NЬıÝ-IORK. KAZINFORM — BUU Bas Assambleıasy 80-shi sessııasynyń Jalpy debatynda Qazaqstan Prezıdenti Qasym-Jomart Toqaev Bas Assambleıaǵa 22 sáýirdi Halyqaralyq jer sharyn kógaldandyrý kúni dep jarııalaıtyn qarar qabyldaýdy usyndy.
— Byltyr adamzat tarıhyndaǵy eń ystyq maýsym boldy. Bul rette Ortalyq Azııada aýa temperatýrasy álemdegi ortasha kórsetkishten eki ese joǵary ekenin aıtqan abzal. Alataý muzdyqtary tez erı bastady. Bul mıllıondaǵan halyqtyń sý jáne azyq-túlik qaýipsizdigine qater tóndiredi. Qazaqstan Aral qasiretinen sabaq aldy. Josparly is-áreketimizdiń arqasynda, sonyń ishinde halyqaralyq deńgeıdegi yntymaqtastyq nátıjesinde teńizdiń soltústik bóligin saqtap qaldyq. Halyqaralyq Araldy qutqarý qorynyń tóraǵasy retinde elimiz bul mańyzdy baǵyttaǵy belsendi jumysty jalǵastyrady. Degenmen Kaspıı teńizi kúnnen kúnge tartylyp barady. Bul bir óńirdiń ǵana problemasy emes, jahandyq deńgeıde dabyl qaǵatyn máselege aınaldy. Sondyqtan aımaqtaǵy seriktesterimizdi jáne barsha halyqaralyq qoǵamdastyqty Kaspııdiń sý qoryn saqtaý úshin jedel sharalardy birlese qabyldaýǵa shaqyramyz, — dedi Qasym-Jomart Toqaev.
Osy oraıda Prezıdent byltyr Qazaqstan Frantsııa, Saýd Arabııasy jáne Dúnıejúzilik bankpen birlesip One Water sammıtin ótkizgenin eske saldy.
— Bolashaqta sý tapshylyǵyn boldyrmaý maqsatynda anaǵurlym tyǵyz úılestirý, ınvestıtsııa jáne ornyqty sheshim qajet. Atalǵan máseleni kún tártibine shyǵarý úshin elimiz Birikken Ulttar Uıymymen jáne basqa halyqaralyq qurylymdarmen seriktese otyryp, kelesi jyly sáýir aıynda Astanada Óńirlik ekologııalyq sammıt uıymdastyrady. Qorshaǵan ortany qorǵaý salasyndaǵy mindettemelerimiz aıasynda elimizde «Taza Qazaqstan» jalpyulttyq aktsııasy júzege asyrylyp jatyr. Bul qozǵalys tazalyqqa, qoqys jınaýǵa jáne ekologııalyq aǵartýshylyqqa atsalysatyn mıllıondaǵan eriktini ortaq iske jumyldyrady. Qazaqstannyń bastamasymen BUU 2026 jyldy Ornyqty damý maqsattary jolyndaǵy Halyqaralyq eriktiler jyly dep jarııalady. Uıymǵa múshe memleketterdiń bárin osy mańyzdy bastamaǵa qoldaý bildirip, yntymaqtastyq ornatýǵa shaqyramyz. Osy oraıda Bas Assambleıaǵa 22 sáýirdi Halyqaralyq jer sharyn kógaldandyrý kúni dep jarııalaıtyn qarar qabyldaýdy usynamyn, — dedi Memleket basshysy.
Buǵan deıin habarlaǵanymyzdaı, Memleket basshysy BUU Bas Assambleıasynyń mereıtoılyq 80-sessııasynyń Jalpy debattyń ashylýyna qatysyp otyr.
Prezıdent Qasym-Jomart Toqaevtyń Nıý-Iork tórinde BUU minberinen sóılegen sózin Jibek Joly arnasy tikeleı efırde kórsetti.
Osydan buryn Prezıdent Gazadaǵy gýmanıtarlyq daǵdarystyń aýqymy keńeıip bara jatqanyna alańdaýshylyq bildirdi.