Kaspııdiń eń ádemi jaǵajaılarynyń biri qoqys alańyna aınaldy
AQTAÝ. KAZINFORM – Mańǵystaý oblysynyń turǵyndary Kaspıı teńiziniń jaǵalaýyndaǵy eń ádemi jerlerdiń biri – «Kók shyǵanaq» jaǵajaıyndaǵy qoqysqa shaǵymdandy.
Turǵyndar túsirgen beınejazbada jaǵalaýdaǵy qoqystyń kópten jınalmaǵany baıqalady. Óıtkeni konteınerdiń mańy qoqys paketterge tolyp ketken. Odan bólek jaǵalaýda bos bótelkeler men azyq-túlik qaldyqtar shashylyp jatyr. Al Túpqaraǵan aýdanynyń ákimdigi atalǵan jaǵajaıdy kúnde tazalaıtyndaryn jetkizdi. Sondaı-aq, budan bylaı polıtsııa qyzmetkerleri kezekshilik júrgizip, teńiz jaǵasyn lastaǵandarǵa aıyppul salynbaq.
«Kók shyǵanaq» - Túpqaraǵan aýdanynyń ortalyǵy Fort-Shevchenko qalasynan 70 shaqyrym, Saıyn-Shapaǵatov eldi mekeninen 40 shaqyrymdaı jerde shalǵaıda ornalasqan. Atalǵan jer sýǵa túsýge ruqsat etilmegen aımaqqa jatady. Turǵyndar men qonaqtar úshin Saıyn-Shapaǵatov ákimdigi aımaqtyń kire berisine bılbord ornalastyrǵan. Sondaı-aq, jaǵalaý kommýnaldyq jaǵajaı bolmaǵandyqtan tazalyǵyn kútip-ustaýǵa arnaıy qarajat qarastyrylmaǵan.
«Kók shyǵanaq» teńiz jaǵalaýy tıym salynǵan jer bola turǵanyna qaramastan jaz mezgilinde jan-jaqtan keletin demalýshylar sany óte kóp. Olar kóbine tazalyq saqtamaı, qoqys tastap ketetin jaǵdaılar jıi kezdesedi. Túpqaraǵan aýdan ákimdigi 21 tamyz kúni tazalyq jumystaryn júrgizdi. Aldaǵy ýaqytta patrýldik polıtsııa kezekshilik uıymdastyryp, aıyppul salýdy jáne jazǵy ýaqytta teńiz jaǵalaýyna tazalyq jumystaryn júrgizýge qarajat bólýdi qarastyryp otyrmyz. Bular qysqa merzimdi is- sharalar, al uzaq merzimdi is -shara retinde ınvestıtsııalyq joba týrızm salasynda jasaqtalǵany jón. Aýmaqtyń ıesi bolǵan kezde ǵana tártip saqtalady. Turǵyndar men qonaqtardan jaýapkershilik saqtaýdy suraımyz. Biz tazalyq mádenıetin qalyptastyrýymyz qajet», - dedi aýdan ákimdiginiń qyzmetkerleri.
