Kaspııdiń birqatar aýmaǵynda teńizge erkin shyǵýǵa ruqsat etiledi
ASTANA. KAZINFORM — QR Ulttyq qaýipsizdik komıtetiniń tóraǵasy 3 tamyzda Kaspıı teńizi jaǵalaýynyń birqatar bóliginde rejımdik shekteýlerdi toqtatý týraly buıryqqa qol qoıdy.
Qujatqa sáıkes, 2026 jylǵy 31 jeltoqsanǵa deıin Kaspıı teńiziniń Qazaqstanǵa tıesili jaǵalaýyndaǵy myna aýmaqtarda rejımdik shekteýler toqtatylady:
- Túpqaraǵan múıisinen Úrdik múıisine deıin;
- Saýra eldi mekeninen Saǵyndyq múıisine deıin;
- Skalıstyı múıisinen Peschanyı múıisine deıin;
- Peschanyı múıisinen Adamtas múıisine deıin.
Bul shekteýdiń teńiz porttary, sý alý arnalary, gaz termınaldary, teńiz dálizderi men farvaterler ornalasqan aýmaqtarǵa qatysy joq.
Atalǵan aýmaqtarda teńizge eki mılge (shamamen 3,7 shaqyrym) deıin erkin shyǵýǵa jáne sýǵa túsýge ruqsat etiledi. Sondaı-aq demalys, týrızm jáne sport úshin shaǵyn kólemdi kemelerdi, sýústi jáne sýasty kólik quraldaryn, muz ústinde júretin quraldardy paıdalanýǵa bolady.
Buıryq 22 tamyzdan bastap qoldanysqa engiziledi.
Aıta keteıik, buǵan deıin Kaspıı jaǵalaýynda TJM qyzmetkerlerine arnalǵan elimizdegi alǵashqy demalys orny ashylǵany habarlandy.
