Kaspııdiń biregeı tabıǵatyn saqtaý úshin halyqaralyq qor qurylady
ASTANA. KAZINFORM — Prezıdent Qasym-Jomart Toqaev Kaspıı teńiziniń bıoalýantúrliligin saqtaý úshin brakonerlikpen kúresti kúsheıtip, sırek kezdesetin janýarlardyń tirshilik ortasyn qorǵaý qajet ekenin málimdedi. Memleket basshysy Kaspıı ıtbalyqtaryn saqtaýǵa jáne ekojúıeni qorǵaýǵa baǵyttalǵan halyqaralyq yntymaqtastyqty jandandyrýǵa shaqyrdy.
Jıynda Prezıdent Kaspııdegi bıoalýantúrlilikti saqtaý úshin qosymsha sharalardy qolǵa alýdyń mańyzyna toqtaldy.
Onyń pikirinshe, teńizdiń tartylýy, tabıǵı ómir súrý ortasynyń ózgerýi, lastaný jáne antropogendik júktemeniń artýy ýyldyryq shashatyn oryndardy qalpyna keltirý, sondaı-aq ózen ańǵarlaryndaǵy ekojúıeni, flora men faýnanyń erekshe osal túrlerin qorǵaý jumystaryn kúsheıtýdi talap etedi.
— Soltústik Aral tájirıbesi ınjenerlik sharalar men tabıǵatqa baǵdarlanǵan ǵylymı tásilderdi ushtastyrý sý sharýashylyǵyna qatysty jáne ekologııalyq mindetterdi tıimdi sheshýge múmkindik beretinin kórsetti. Sonymen qatar jaǵalaýdaǵy aýmaqtardy saqtap, klımattyq ózgeristerdiń saldaryn jeńildetýge bolatynyn dáleldedi. Zańsyz balyq aýlaýǵa jáne bıologııalyq resýrstardyń kóleńkeli aınalymymen kúreske basa mán berý qajet. Bul máseleni ujymdyq kúsh-jiger arqyly ǵana sheshýge bolady. Quqyq qorǵaý jáne tabıǵatty qorǵaý organdary arasynda aqparat almasýdy jandandyryp, birlesken jedel is-sharalar ótkizý qajet. Tsıfrlyq monıtorıng quraldaryn qoldanǵanymyz jón. Qazaqstan osy ortaq jumysqa Kaspıı ıtbalyǵy men onyń tirshilik etý ortasyn saqtaý maqsatynda qurylǵan memlekettik tabıǵı rezervat áleýetin jumyldyrýǵa ázir. Itbalyqtardyń tirshilik tsıkli úshin óte mańyzdy aımaqtarda antropogendik áserdi barynsha azaıtý maqsatynda ekologııalyq dálizderdi saqtaý máselesine de basa mán bergen jón. Saıyp kelgende, Kaspııdi ıtbalyqsyz elestetý múmkin emes. Elimiz Bıoalýantúrlilikti saqtaý jónindegi halyqaralyq qor qurý jumysyn qolǵa aldy. Onyń maqsaty — tabıǵatty qorǵaý isinde álemdik qoǵamdastyqtyń kúsh-jigerin biriktirý. Kaspıı teńiziniń biregeı ekojúıesi men sırek kezdesetin túrlerdi qorǵaý qor qyzmetiniń mańyzdy baǵyttarynyń biri bolady. Qor jumysyna belsendi atsalysyp, birlesken naqty jobalardy iske asyrýǵa shaqyramyn, — dedi Memleket basshysy.
