Kaspııdiń bolashaǵyna alańdaǵan Qazaqstan bes elge kúsh biriktirýdi usyndy

ASTANA. KAZINFORM — Kaspıı teńiziniń deńgeıi tómendep, óńirdegi ekologııalyq jaǵdaı kúrdelenip barady. Qazaqstan teńizdi saqtap qalý úshin bes Kaspıı mańy memleketiniń kúsh-jigerin biriktirip, birlesken monıtorıng júıesin qurýdy jáne 2026–2036 jyldarǵa arnalǵan is-qımyl josparyn ázirleýdi usyndy. Bul týraly Ekologııa mınıstrligi málim etti.

Kaspııdiń bolashaǵyna alańdaǵan Qazaqstan bes elge kúsh biriktirýdi usyndy
Foto: Ekologııa mınıstrligi

Qazaqstan Kaspıı teńiziniń ekojúıesin saqtaý jáne onyń deńgeıin tómendetýge qarsy is-qımyl maqsatynda halyqaralyq jáne óńirlik yntymaqtastyqty nyǵaıtýǵa beıildiligin rastady.

Halyqaralyq kezdesýde sóz sóılegen qazaqstandyq tarap ortasha jyldyq temperatýranyń ósý qarqyny álemdik ortasha kórsetkishterden 2,5 ese asatyn Kaspıı óńirindegi klımattyq ózgeristerdiń údeýine alańdaýshylyq bildirdi.

Kaspııdiń bolashaǵyna alańdaǵan Qazaqstan bes elge kúsh biriktirýdi usyndy
Foto: Ekologııa mınıstrligi

Kaspııdiń soltústik-shyǵys jaǵalaýy, jaǵalaýdaǵy qaýymdastyqtardyń ál-aýqaty jáne aımaqtyń turaqty damýy úshin taıazdyqtyń áserine erekshe nazar aýdaryldy.

— Qazaqstan Kaspıı teńiziniń deńgeıin tómendetý máselesi boıynsha Úkimetaralyq komıssııa qurýdy, sondaı-aq Qazaqstan Respýblıkasynyń Prezıdenti Qasym-Jomart Toqaev usynǵan Kaspıı sý resýrstaryn saqtaý jónindegi memleketaralyq baǵdarlamany ilgeriletýdi qosa alǵanda, Kaspıı mańy memleketteriniń bastamalaryn quptady, — delingen habarlamada.

Kaspııdiń bolashaǵyna alańdaǵan Qazaqstan bes elge kúsh biriktirýdi usyndy
Foto: Ekologııa mınıstrligi

Ári qaraıǵy jumystyń basym baǵyttary retinde Qazaqstan Kaspıı teńizi deńgeıiniń aýytqýy boıynsha 2026-2036 jyldarǵa arnalǵan is-qımyl josparyn ázirleýdi, birlesken monıtorıng pen boljaý júıelerin nyǵaıtýdy, sondaı-aq jaǵalaý aýmaqtaryn beıimdeý sharalaryn ázirleýdi qosa alǵanda, saıası ýaǵdalastyqtardan birlesken sharalardy praktıkalyq iske asyrýǵa kóshýdi belgiledi.

Qazaqstan COP31-ge usynǵan Kaspıı óńiri úshin basym ekologııalyq jáne beıimdeý jobalaryn iske asyrýǵa járdemdesýge arnalǵan óńirlik ınvestıtsııalyq baǵdarlama jeke atap ótildi. Qazaqstan sondaı-aq halyqaralyq uıymdardy, qarjy ınstıtýttaryn jáne damý boıynsha seriktesterdi tartý úshin «Kaspıı teńiziniń dostary» platformasyn odan ári damytýdy jaqtady.

Kaspıı teńizin saqtaýda naqty jáne ólshenetin nátıjelerge qol jetkizý úshin qoldanystaǵy óńirlik tetikter, eń aldymen Tegeran konventsııasy negizinde bes Kaspıı mańy memleketteriniń kúsh-jigerin shoǵyrlandyrý qajettigi atap ótildi.

Aıta keteıik, búgin Quryltaı depýtaty Arman Haırýllınniń Premer-mınıstrdiń orynbasary Qanat Bozymbaevtyń atyna Kaspıı teńizin saqtaýǵa baǵyttalǵan ekologııalyq sharalar boıynsha saýal joldaǵan edi. Onyń aıtýynsha, sońǵy 25 jylda teńiz akvatorııasy 16 myń sharshy kılometrge azaıǵan. Tartylǵan Soltústik Kaspııde shańdy daýyldar jıilep, tuzdy tozań «balshyq jaýyny» bolyp túsedi. Osyǵan baılanysty Aral tájirıbesi negizinde kepken aýmaqtarǵa fıtomelıoranttar egý qajet.