Kaspııdiń jańa mártebesi Qazaqstanǵa qandaı múmkindikter beredi
ASTANA. QazAqparat - Kaspıı teńiziniń quqyqtyq mártebesi týraly konventsııaǵa qol qoıý arqyly Qazaqstan úshin birqatar múmkindikter ashylyp otyr. Bul múmkindikterge QR Tuńǵysh Prezıdenti - Elbasy kitaphanasy Geosaıasat jáne aımaqtyq zertteýler qyzmetiniń jetekshi ǵylymı qyzmetkeri Aryspaı Qabdýǵalıev baǵa berip kórdi, dep habarlaıdy QazAqparat.
«Qazaqstan ashyq teńizge shyǵa almaıtyn qurlyqtyq elden teńiz derjavasyna aınalyp keledi», - dedi sarapshy.
Qujattyń arqasynda barlyq Kaspıı mańy elderiniń resýrstyq-kóliktik áleýeti ashylady. Onyń ishinde Qazaqstan úshin kómirsýtekterdi, jeke ónimder men tranzıttik taýarlardy eýropalyq jáne azııalyq naryqtarǵa tasymaldaý múmkindigi keńeıip keledi. Sonymen qatar Kaspıı óńirinen taýarlardy tikeleı Eýropaǵa shyǵarýǵa jaǵdaılar jasalýda. Bul óz kezeginde birinshi kezekte transqurlyqtyq tasymaldardy ońtaılandyrýdy ári teńiz porttaryn jańǵyrtýdy yntalandyrady.
Sonymen birge, Konventsııaǵa qol qoıý nátıjesinde - Kaspıı túbimen qubyr tartý boıynsha jobalardy qaıta qolǵa alýǵa jol ashylady. Eń bastysy, Kaspıı mańy elderiniń bir kelisimge kelýi oqıǵasy memleketaralyq kooperatsııanyń jańa deńgeıin kórsetip otyr.
«Aımaqtyq deńgeıde Kaspıı mańy memleketteriniń jaqyndasýymen qatar, jalpy Ortalyq Azııa elderiniń qatynastaryn nyǵaıtýǵa yntalandyrýshy kúsh-jiger paıda boldy. Budan bólek, energııa resýrstaryn óndirý men tasymaldaýdan bastap, ekologııa men qaýipsizdik salasynda ýaǵdalastyqqa kelý sekildi qadamdardyń keń shoǵyryn qamtıdy. Al jahandyq deńgeıde Kaspıı mańy elderiniń ulttyq damý baǵdarlamalary álemniń aldyńǵy qatarly derjavalary usynystarymen túıindesedi», - dedi A. Qabdýǵalıev.
Sarapshynyń paıymynsha, Konventsııany bekitý - barsha Kaspıı óńiri úshin asa mańyzdy oqıǵa. Sebebi osy memleketterde 260 mln adam ómir súredi. Statıstıkalyq málimetterge qaraǵanda, onyń ishinde 15 mıllıony Kaspıı teńiziniń resýrstary esebinen tirshilik etýde.
