Kaspııdiń qazaqstandyq sektoryndaǵy keme sany eki esege artady - Beıbit Atamqulov

NUR-SULTAN. QazAqparat – Parlament Májilisiniń jalpy otyrysynda palata depýtattary «Sýǵa batyp ketken kemelerdi joıý týraly 2007 jylǵy Naırobı halyqaralyq konventsııasyn ratıfıkatsııalaý týraly» zań jobasyn maquldady, dep habarlaıdy QazAqparat tilshisi.

Konventsııa Halyqaralyq teńiz uıymynyń bastamasymen qabyldandy. Bul qujatqa 53 memleket qosylǵan. Konventsııanyń negizgi maqsaty - sýǵa batyp ketken kemelerdi tez ári tıimdi alyp shyǵý jáne apat saldaryn joıýdyń biryńǵaı qaǵıdalary men rásimderin engizý.

«Konventsııada teńiz apaty kezinde bolǵan zalaldy qarjylaı óteýdi kepildendirý boıynsha keme ıesiniń jáne týdy kóterip júzetin memlekettiń mindetteri bekitilgen. Qujatty ratıfıkatsııalaý qajettiligi Kaspıı teńizinde keme qatynasynyń artýyna baılanysty týyndap otyr. Bul rette Qazaqstan - negizgi júk quraýshy memleket. Kaspıı teńizinde jalpy júk aınalymynyń shamamen 31 paıyzy Aqtaý jáne Quryq porttarynda tıeledi. Búgingi tańda biz Transkaspıı halyqaralyq kólik dálizin belsendi túrde damytyp kelemiz. Irannyń Kaspıı mańy porttarymen jańa avtomobıl-parom qatynasy ashyldy. 2021 jyly Reseıdiń Mahachkala portymen temirjol-parom qatynasyn ashý josparlanyp otyr», - dedi QR Indýstrııa jáne ınfraqurylymdyq damý mınıstri Beıbit Atamqulov.

Aqtaý jáne Túrkmenbashy porttary men Irannyń Amırabad porty arasynda turaqty konteınerlik jeliler iske qosyldy.

«Jalpy alǵanda, 2025 jylǵa qaraı Kaspıı teńiziniń qazaqstandyq sektoryna kiretin kemeler sany eki esege ulǵaıady. Tıisinshe teńiz apattarynyń bolý táýekeli artady», - dedi mınıstr.

Onyń aıtýynsha, konventsııany ratıfıkatsııalaý teńiz apattary bolǵan kezde Qazaqstannyń múddelerin qorǵaý úshin qajetti jaǵdaılar jasaıdy. Birinshiden, elimizdiń sýlaryna kiretin keme ıeleriniń óz jaýapkershiligin saqtandyrý nemese sýǵa batqan kemeni alyp shyǵarý mindetin belgileıdi. Bul Qazaqstanǵa kemeni kóterý shyǵyndaryn óteýdi tikeleı saqtandyrý kompanııasynan talap etýge múmkindik beredi.

Ekinshiden, týyn kóterip júzetin memlekettiń teńiz ákimshiliginen kemeni kóterý jáne apat saldaryn joıý mindetterin oryndaýdy saqtandyrý týraly kýálik túrinde kepildik alady.

Úshinshiden, teńiz apaty bolǵan jaǵdaıda Qazaqstannyń teńiz ákimshiliginiń, keme ıesiniń jáne sheteldik kemeniń teńiz ákimshiliginiń is-qımyl tártibin anyqtaıdy.