Kaspııdiń qazaqstandyq sektorynda tormen balyq aýlaýǵa tyıym salynady
Atyraý oblystyq balyq sharýashylyǵy basqarmasynyń basshysy Artýr Sádibekulynyń málimetinshe, qazir Kaspıı teńiziniń qazaqstandyq bóliginde balyq aýlaý úshin arnaıy
torlar kóbirek qoldanylatyny anyqtalyp otyr. Al, bul jyl saıyn sý astyndaǵy tirshilik ıelerine, ásirese, erekshe qorǵalatyn bekire balyqtary men ıtbalyqtardyń kóbeıýine teris áserin tıgizedi. Endi oǵan Balyq sharýashylyǵy komıtetiniń buıryǵymen 17 tamyzdan bastap tyıym salynbaq.
«Atyraý oblysynyń akvatorııasynda sý keńistigin paıdalaný erejesi (Jaıyq ózeniniń saǵasynan solǵa jáne ońǵa 50 shaqyrym, 3 metr tereńdikke deıin) tolyq saqtalmaıdy.
Janar-jaǵarmaı men ýaqytty únemdeý úshin nemese tıisti materıaldyq-tehnıkalyq bazanyń joqtyǵynan balyqshylar erejede kórsetilgendeı, Jaıyq ózeniniń saǵasynan 50 shaqyrym qashyqta júrmeıdi. Olar tikeleı tyıym salynǵan aımaqta tor qurady.
Nátıjesinde, ýyldyryq shashýǵa nemese qystaý úshin ózenge kiretin sý marjandary torǵa túsip jatady. Mine, sonyń saldarynan sońǵy jyldary Jaıyq ózenine qonys aýdaratyn jartylaı ótpeli balyq sany aıtarlyqtaı azaıyp otyr», - deıdi basqarma basshysy Artýr
Sádibekuly.
Eske sala ketelik, budan buryn Atyraýda eki kúnde Jaıyq ózenine bekireniń 7 mln-ǵa jýyq shabaq jiberilgenin habarlaǵan bolatynbyz.
