Kaspııdiń qazaqstandyq bóliginen reseılik brakoner ustaldy
ASTANA. QazAqparat - Ótken táýlik ishinde «Jaǵalaý kúzeti» men «Batys» óńirlik basqarmalarynyń shekarashylary Qazaqstan men Reseıdiń birqatar azamattaryn ustady, dep habarlaıdy QR UQK ShQ baspasóz qyzmeti.
Kaspıı teńiziniń aıdynyndaǵy brakonerlik is-qımyldy aýyzdyqtap, onyń baılyǵyn saqtaýǵa arnalǵan arnaıy birikken jedel-saýyqtyrý is-shara jalǵasý ústinde.
Nátıjesinde baǵaly balyqtar men aýlaý quraldary tárkilendi.
«Jaǵalaý kúzeti» óńirlik basqarmasynyń shekarashylary Qazaqstan azamatyn ustady. Odan 36 dana bekire tuqymdas balyq, sondaı-aq, 3 júzý quraly - 2 «kazanka» men 1 úrlenetin qaıyq, sondaı-aq, 11 000 metr aý, 1000 qarmaq, 300 metr qural-jabdyqtar tárkilendi.
Osy kúni «Batys» óńirlik basqarmasynyń shekarashylary Reseı Federatsııasynyń azamatyn ustady, odan 423 dana sazan tárkilendi», delingen habarlamada.
