Kaspııdiń biregeı tabıǵı ortasyn saqtap qalý úshin zamanǵa saı ekologııalyq talaptar qajet - Z. Alshymbaev
ASTANA. Qańtardyń 27-si. QazAqparat /Qanat Mámetqazyuly/ - Kaspııdiń biregeı tabıǵı ortasyn saqtap qalý úshin zamanǵa saı ekologııalyq talaptar qajet. Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Zeınolla Alshymbaev osylaı málim etti,
dep habarlaıdy QazAqparat.
«Kaspıı teńizimen bes memleket shektesip jatyr jáne osy aımaqta 20 mln.-nan astam halyq turady. Sońǵy onjyldyqtaǵy Kaspıı tabanyndaǵy kómirsýtekti shıkizattyń mol qorynyń anyqtalyp, barlaý-baqylaý jumystary men munaı men gaz óndirisi qarqyn alýda. Kómirsýtekti shıkizatty óndirý kezinde ekologııalyq talaptardyń saqtalmaýynan teńiz ekologııasyna, onyń qoınaýyndaǵy san alýan faýna men floraǵa, jalpy tabıǵatymyzǵa úlken qaýip týǵyzyp otyr. Jaǵalaýdaǵy burǵylanyp, keıin sý astynda qalǵan uńǵymalardan shyǵatyn, sondaı-aq basqa da jaǵdaıda teńizge munaı ónimderiniń tógilýi teńiz bıosferasyna orasan zor zııan keltirýde. Sońǵy kezderdegi ekologııalyq apattar, balyqtar men ıtbalyqtardyń jappaı qyrylý faktileriniń jıileýi, Kaspııdegi jer qoınaýyn ıgerýshi kompanııalardyń ekologııalyq talaptardy saqtamaýy jurtshylyqtyń alańdaýshylyǵyn týǵyzyp otyr», dedi Z. Alshymbaev.
Soǵan oraı, depýtat Kaspııdiń biregeı tabıǵı ortasyn saqtap qalý úshin halyqaralyq quqyq talaptary negizinde qazirgi zamanǵy ozyq ekologııalyq talaptar standarttaryn qoldaný qajettigin atap ótti. Sonymen birge, depýtat Sh.Esenov atyndaǵy Kaspıı memlekettik tehnologııalar jáne ınjınırıng ýnıversıtetinde Kaspıı ekologııasyna qatysty jan-jaqty tereń zertteýler saralanǵanyn aıtyp, sonyń ishinde birqatar máselelerge Kaspıı mańy memleketteriniń memlekettik organdarynyń nazar aýdarýy tıistigin alǵa tartty. «Birinshiden, Kaspıı basseıninde tabıǵat qorǵaý máselelerin retteıtin biregeı normatıvti-quqyqtyq jáne ádistemelik bazany ázirleýdi basym mindet dep taný qajet. Budan basqa, óńirdegi bıoresýrstardy saqtaý jáne qorǵaý jónindegi memleketaralyq baǵdarlama qabyldanýy tıis. Tıisti memleketter aýmaqtarynda memlekettik ekologııalyq monıtorıng júıesin jasaý baǵdarlamasy ázirlense ıgi. Sonymen birge, Kaspıı mańy memleketteriniń ýákiletti memlekettik organdarynyń birlesken ózara is-qımyldaryn kúsheıtýleri qajet. Bul kóterilgen usynystardy Qazaqstan Respýblıkasynyń Úkimeti de zerdelep, tıisti sheshim qabyldaýyna yqpal etýi qajet dep esepteımin», dedi depýtat.
