Kaspııdi qorǵaý sharalary kúsheıtildi
ASTANA. QazAqparat - Qazirgi ýaqytta Kaspıı teńiziniń qazaqstandyq sektorynda (KTQS) Qazaqstan jalaýyn tikken 300-den astam keme júzýde, dep habarlaıdy QR IDM baspasóz qyzmeti.
12 keme halyqaralyq tasymaldaýlardy iske asyrsa, qalǵandary munaı ken oryndaryn ıgerý operatsııalaryna atsalysady. Budan bólek, kúndelikti qazaqstandyq porttarǵa Kaspıı jaǵalaýyndaǵy memleketterdiń ondaǵan kemeleri kiredi. KTQS-yndaǵy kemelerdiń paıdalaný qarqyndylyǵy, tasymaldanatyn munaı men janarmaıdyń kólemderi sýdy lastaý qaýpin týǵyzady. Tótenshe jaǵdaılardyń aldyn alý maqsatynda QR IDM Kólik komıteti teńizdi qorǵaýǵa qatysty normatıvtik-quqyqtyq bazany keńeıtý jumystaryn bastady.
Osylaısha, 2001 jyldyń Býnkerlik janarmaıdyń lastaýynan keletin zııan úshin azamattyq jaýapkershilik jónindegi Halyqaralyq konventsııany (ári qaraı - Konventsııa) jáne Munaımen lastaýdan keltirilgen zııan úshin azamattyq jaýapkershilik týraly halyqaralyq konventsııany ózgertý jónindegi 1992 jylǵy hattamany ratıfıkatsııalaý josparlanǵan (ári qaraı - Hattama).
Qazir zańnamada keme ıesiniń jaýapkershiligi tek qana júk retinde tasymaldanatyn munaımen lastaý kezindegi keltiriletin zııan úshin ǵana qarastyrylǵan. Biraq, býnkerlik janarmaı da sondaı qater tóndiredi. Konventsııany ratıfıkatsııalaý teńizdi janarmaımen lastaǵan kezde keme ıesiniń jaýapkershiligin belgileýge múmkindik beredi. Sonymen qatar, lastaý qaterinen mindetti saqtandyrýǵa talaptary qarastyrylyp, býnkerlik janarmaıdyń tógilýinen zııan shekken tulǵalarǵa ótemaqy mehanızmi belgilenetin bolady. Qazirgi ýaqytta Konventsııaǵa 75 el múshe.
Atalǵan Hattamany ratıfıkatsııalaý tankermen tasymaldaýda munaımen lastaý kezinde keltirilgen zııan úshin keme ıesiniń jaýapkershiligi boıynsha tártip ózektiliginiń arttyrýǵa múmkindik beredi. Osy tárizdi tártip 133 memlekette qoldanylady. Sonymen birge lastaý qaterinen mindetti saqtandyrýǵa keme ıesiniń jaýapkershiligin 20 mln-nan 126 mln dollarǵa deıin arttyrý kózdelgen; munaımen lastaýdan keltirilgen zııan úshin tólemaqy mólsheri kemeniń sý syıymdylyǵyna baılanysty bolady; azamattyq jaýapkershilikti qoldaný aýmaǵy aıryqsha ekonomıkalyq zonaǵa deıin keńeıtiledi.
Sonymen birge osy atap ótken qujattardy ratıfıkatsııalaýmen qatar Komıtetpen ulttyq zańnamaǵa kólikke qarasty máseleler boıynsha ózgeristerdi engizý jumystary júrgizilýde. Atap aıtqanda, «Saýda maqsatynda teńizde júzý týraly» QR zańynda Kemelerdiń lastaýyn boldyrmaý erejelerin bekitýge qatysty QR IDM quzyreti qarastyrylǵan.
Sonymen birge 2017 jyly lańkestik áreketten kemeler men port ınfraqurylymyn qorǵaý boıynsha sharalar kúsheıtilgen. Porttardy qorǵaý boıynsha turaqty baǵalaý qajettiligi jóninde talaptar belgilengen.
