Kaspııden Parsy shyǵanaǵyna keme arnasy salý máselesi talqylanýda

ASTANA. QazAqparat - Kaspıı teńizinen Parsy shyǵanaǵyna kememen júretin arnany ótkizý máselesi talqylanyp otyr, dep habarlady Irannyń Reseıdegi Elshisi Mehdı Sanaı Sankt-Peterbor memlekettik ýnıversıtetiniń stýdentterimen kezdesý kezinde.

«Iá, bul másele talqylanyp jatyr», - dep jaýap berdi Elshi stýdenttiń qoıǵan suraǵyna, biraq egjeı-tegjeıin naqtylaǵan joq.

Reseılik TASS agenttiginiń habarlaýynsha, Mehdı Sanaı stýdentterge Irannyń ishki saıasaty men halyqaralyq qatynastary týraly dáristi orys tilinde oqyǵan.

Kaspıı teńizi - Jerdegi eń iri tuıyq sý qoımasy. Jaǵalaýy 7 myń  shaqyrymǵa sozylǵan, Reseı, Qazaqstan, Túrikmenstan, Iran jáne Ázerbaıjan aýmaǵymen ótedi. Kaspııdi Parsy shyǵanaǵymen qosý úshin Iran jerinde keme arnasyn qazýǵa bolady.