Kaspııdegi qaıǵyly oqıǵa: Tórt adam sýǵa batyp ketti

NUR-SULTAN. QazAqparat - 5 tamyzda keshke qaraı Kaspııde eki qaıǵyly oqıǵa boldy. Quryq aýylynda úsh jasóspirim jáne Kendirli aýdanynda 28 jastaǵy er adam sýǵa batyp ketti, dep habarlaıdy QazAqparat Lada.kz saıtyna silteme jasap.

Qutqarýshylardyń aıtýynsha, 5 tamyzda saǵat 18:15-te Quryq aýylynda 2002 jyly týǵan eki qyz ben 2003 jyly týǵan jas jigit sýǵa batyp ketti. Qazir olardyń denelerin izdestirýge 10 qutqarýshy men eki qaıyq jumyldyrylǵan.

Sonymen qatar, Kendirlidegi «Samal» demalys ortalyǵynda taǵy bir qaıǵyly oqıǵa boldy. Onda 1991 jyly týǵan er azamattyń denesin týystary sýdan shyǵaryp aldy.

Esterińizge sala keteıik, taıaýda Aqtaýda er adam «Shora» sý aǵytqyshyna batyp ketken bolatyn. Sonymen qatar, tórt adamnan turatyn otbasyn teńiz jaǵalaýynda sýǵa batyp bara jatqan jerinen qutqarýshylar aman alyp qaldy.