Kaspııdegi Qashaǵan ken ornynan munaı óndirý qaıta jalǵasady
NCOC kompanııasy baspasóz qyzmetiniń málimetinshe, «Qashaǵan» ken ornyndaǵy teńiz jáne qurlyq nysandarynda josparly aldyn alý maqsatyndaǵy jóndeý jumystary oıdaǵydaı aıaqtalǵan.
Óndiristik operatsııalardy tolyqtaı toqtatý kezinde NCOC qajetti tehnıkalyq kútim jasaý men tekserý jumystaryn júrgizdi. Óndiristik operatsııalardyń qaýipsizdigi men senimdiligin qamtamasyz etý baǵytyndaǵy birqatar jobany iske asyrdy.
«NCOC úshin josparly aldyn alý maqsatyndaǵy jóndeý jumystary – nysannyń bútindigin qamtamasyz etý, senimdiligin men óndiris kólemin arttyrý baǵytyndaǵy aıtýly kezeń. Keń aýqymdy jumystardy qaýipsiz ári ýaqtyly oryndaýǵa 10 myńnan astam adam jumyldyryldy. Ony qazaqstandyq mamandar atqardy. Jóndeý jumystaryn atqarýǵa atsalysqan taraptarǵa – merdigerlerimiz, aktsıonerlerimiz ben memlekettik organdarǵa osy mańyzdy jobany ýaqtyly jáne oıdaǵydaı aıaqtaý maqsatynda kórsetken qoldaýlary men qosqan úlesteri úshin alǵys bildirgim keledi» -deıdi NCOC kompanııasynyń basqarýshy dırektory Olıve Lazar.
Onyń aıtýynsha, jóndeý jumystary aıaqtalǵannan keıin NCOC uńǵymalardy qaıta ashyp, óndiristik júıelerdi qalypty jumys rejımine aýystyrdy. Teńiz jáne qurlyq nysandaryn birtindep qaıta iske qosa bastady. NCOC qaýipsizdik pen óndiristiń turaqtylyǵyna basty nazar aýdaryp, óndiris kólemin arttyrýdy budan ári jalǵastyra bermek.
Budan buryn 1 maýsymnan bastap «Qashaǵan» ken ornyndaǵy óndiristik nysandary jumysy 45 kúnge toqtaıtynyn jazǵan edik.
Osy kezeńde ónimdilikti jáne óndirý júıesiniń senimdiligin ońtaılandyrý men odan ári arttyrýǵa arnalǵan birqatar jumystar men jobalardyń oryndalýyn qamtamasyz etý kózdelgen. Kólemi 2 mln adam-saǵattan asatyn aýqymdy jumystardy 45 kún ishinde oryndaý josparlanǵan.
«Qashaǵan» – Kaspıı teńiziniń qazaqstandyq sektorynda munaı óndiriletin alǵashqy eń iri ken orny. 2000 jyly ashylǵan. Munda óndiriletin munaı qory – boljam boıynsha 9-13 mlrd barrel. «Qashaǵanda» kommertsııalyq munaı óndirý 2016 jylǵy kúzde bastalǵan.
