Kaspııdegi tótenshe jaǵdaıdan keıin qutqarylǵan áskerı qyzmetshi esin jıdy
AQTAÝ. KAZINFORM — Mańǵystaý oblysynda oqý-jattyǵý kezinde bolǵan tótenshe jaǵdaıdan keıin oblystyq aýrýhanaǵa jetkizilgen áskerı qyzmetshiniń jaǵdaıy turaqty. Qazir ol terapııa bóliminde em alyp, dárigerlerdiń turaqty baqylaýynda.
Mańǵystaý oblysynda oqý-jattyǵý kezinde bolǵan qaıǵyly oqıǵadan keıin aýrýhanaǵa jatqyzylǵan áskerı qyzmetshiniń jaǵdaıy turaqty. Bul týraly Mańǵystaý oblysynyń densaýlyq saqtaý basqarmasynyń basshysy Bekbolat Іzbasarov málimdedi.
— 24 qyrkúıekte Mańǵystaý oblysynda bolǵan qaıǵyly oqıǵaǵa baılanysty áskerı qyzmetshilerdiń biri oblystyq aýrýhanaǵa jetkizildi. Aýrýhanaǵa túsken kezde oǵan barlyq qajetti tekserýler júrgizildi. Qazirgi ýaqytta onyń jaǵdaıy turaqty. Áskerı qyzmetshi terapııa bóliminde em alyp jatyr jáne medıtsına qyzmetkerleriniń turaqty baqylaýynda, — dedi Bekbolat Іzbasarov.
Buǵan deıin 24 qyrkúıekte Kaspıı teńiziniń jaǵalaýynda oqý-jaýyngerlik tapsyrmany oryndaý kezinde tótenshe jaǵdaı bolǵany habarlanǵan edi.
Aýa raıynyń kúrt nasharlap, jeldiń kúsheıýine baılanysty áskerı qyzmetshilerdi teńizge alyp ketken. Naqtylanǵan málimet boıynsha, 12 adam qaza tapqan, úsheýi qutqarylǵan, taǵy eki áskerı qyzmetshini izdeý jumystary jalǵasyp jatyr. Mańǵystaý oblysyndaǵy tótenshe jaǵdaıdan qaza tapqan áskerı qyzmetshiler sany 12 adamǵa jetti.
Qaıǵyly oqıǵanyń barlyq mán-jaıyn anyqtaý úshin Qazaqstannyń Bas prokýratýrasy qylmystyq is qozǵady. Oqıǵa ornynda Іshki ister mınıstrligi, Tótenshe jaǵdaılar mınıstrligi jáne prokýratýra qyzmetkerleriniń qatysýymen jedel-tergeý toby jumys istep jatyr, qajetti sot saraptamalary taǵaıyndaldy. Bas prokýratýra Aqtaý qalasynda áskerı qyzmetshilerdiń qaza bolýyna qatysty tergeýdi baqylaýǵa aldy.
Prezıdent Qasym-Jomart Toqaev qaza tapqan áskerı qyzmetshilerdiń týǵan-týystary men jaqyndaryna kóńil aıtyp, bolǵan oqıǵanyń barlyq mán-jaıyn anyqtaý jáne qaza tapqandardyń otbasylaryna kómek kórsetý úshin qajetti sharalar qabyldaýdy tapsyrdy.
Qaıǵyly oqıǵadan keıin Premer-mınıstrdiń ókimimen áskerı qyzmetshilerdiń qaza bolý sebepterin tergeý jónindegi Úkimettik komıssııa quryldy. Onyń quramyna Qorǵanys mınıstrliginiń, Mańǵystaý oblysy ákimdiginiń, Tótenshe jaǵdaılar mınıstrliginiń, Densaýlyq saqtaý mınıstrliginiń, Eńbek jáne halyqty áleýmettik qorǵaý mınıstrliginiń, Kólik mınıstrliginiń, Bas áskerı prokýratýranyń jáne Shekara qyzmetiniń ókilderi kirdi.
25 qyrkúıek Qazaqstanda Mańǵystaý oblysynda qyzmettik mindetterin atqarý kezinde áskerı qyzmetshilerdiń qaza bolýyna baılanysty jalpyulttyq aza tutý kúni bolyp jarııalandy.
