Kaspııdegi qaıǵyly oqıǵaǵa jaýap qyzmetten bosatýmen jáne qamaýǵa alýmen shektelmeýi kerek — Shatalov
ASTANA. KAZINFORM — Quryltaı depýtaty Nıkıta Shatalov Mańǵystaý oblysynda áskerı qyzmetshilerdiń qaza bolýyna qatysty júrgizilip jatqan tergeý týraly pikir bildirip, qoǵamnyń ádildikke degen talaby kadrlyq sheshim qabyldaý jáne jekelegen laýazymdy tulǵalardy jaýapkershilikke tartýmen shektelmeýi kerek ekenin aıtty.
Onyń pikirinshe, Qorǵanys mınıstrliginiń jumysyn júıeli túrde tekserip, qaıǵyly oqıǵaǵa ákelýi múmkin sebepterdi anyqtaý qajet.
— Mańǵystaý oblysyndaǵy qaıǵyly oqıǵadan keıin qoǵam sarbazdardyń qazasyna kinálilerdiń jazalanatynyn zańdy túrde kútedi. Bul talap oryndy, biraq oǵan beriletin jaýap qyzmetten bosatý, qamaýǵa alýmen shektelmeýi kerek — vedomstvonyń qalaı jumys isteıtinin júıeli túrde tekserý qajet, — dedi Shatalov.
Ol Memleket basshysynyń tapsyrmasymen Qorǵanys mınıstrligin keshendi tekserý jónindegi komıssııanyń qurylǵanyna nazar aýdardy. Depýtattyń pikirinshe, onyń jumysy tek tártip máselelerin ǵana emes, qorǵanysqa baǵyttalǵan qarajattyń qanshalyqty tıimdi paıdalanylyp jatqanyn da baǵalaýǵa múmkindik beredi.
Shatalov qylmystyq tergeýge de toqtaldy. Qarýly kúshterdiń bes laýazymdy tulǵasyna kúdikti mártebesi berilip, olar ýaqytsha ustaý ızolıatoryna qamaldy.
Depýtat árbir iske qatysy bar adamnyń áreketine túpkilikti baǵany sot berýi tıis ekenin atap ótti.
Onyń pikirinshe, keshendi tekserý qorytyndysy basqa da zań buzýdy, sonyń ishinde vedomstvonyń qarjylyq qyzmetine qatysty zań buzýdy anyqtaýy múmkin.
Shatalov Qorǵanys mınıstrligi basshylyǵynyń aýysýyna da pikir bildirdi. Onyń aıtýynsha, vedomstvonyń jańa basshysy tekserý barysynda anyqtalatyn júıeli máselelerdi joıýǵa basa nazar aýdarýy tıis.
Depýtattyń sózinshe, basty basymdyqtardyń biri áskerı qyzmetshilerdiń qaýipsizdigin qamtamasyz etý, olardyń ómiri men densaýlyǵyn saqtaý bolýy kerek.
Shatalov bolǵan oqıǵadan keıin memleket tarapynan birqatar sheshim qabyldanǵanyn, sonyń ishinde komıssııalar qurylǵanyn, tergeý júrgizilip, qaza bolǵandardyń otbasylaryna qoldaý kórsetilgenin atap ótti.
Onyń aıtýynsha, túpkilikti qorytyndy tek jan-jaqty talqylaý men egjeı-tegjeıli tergeýden keıin jasalýy kerek.
— Ádildik egjeı-tegjeıli tergeý qorytyndysy boıynsha qalpyna keltirilýi tıis. Kináliler jaýapkershilikten qutylmaýy, al kinásizder jazalanbaýy kerek. Bul qaza bolǵandardy qaıtara almaıdy. Biraq qabyldanǵan sheshimder mundaı jaǵdaıdyń qaıtalanýyna jol bermeýi tıis, — dep atap ótti depýtat.
Eske salaıyq, Kaspııdegi qaıǵyly oqıǵa 24 qyrkúıekte oqý-jaýyngerlik tapsyrmany oryndaý kezinde boldy. Aýa raıynyń kúrt nasharlap, jeldiń kúsheıýi saldarynan áskerı qyzmetshilerdi teńiz aǵyzyp áketti.
Buǵan deıin Memleket basshysy Qorǵanys mınıstrligindegi ahýaldy keshendi tekserý jónindegi komıssııa qurýdy tapsyrǵan bolatyn. Komıssııaǵa atqarylǵan jumystyń alǵashqy nátıjeleri týraly Prezıdentke jeti kún ishinde baıandaý tapsyryldy.
Búgin Prezıdent Dáýren Qosanovty Qazaqstannyń Qorǵanys mınıstri qyzmetinen bosatyp, bul laýazymǵa Aıdos Myrzahmetovti taǵaıyndady.
