Kaspııdegi qaıǵyly oqıǵadan keıin Qorǵanys mınıstrliginiń jumysynan kemshilikter anyqtaldy — Bektenov
ASTANA. KAZINFORM — QR Premer-mınıstri Oljas Bektenov depýtattyq saýalǵa bergen jaýabynda áskerı oqý-jattyǵýlar kezinde anyqtalǵan kemshilikter men sarbazdardyń qaýipsizdigin kúsheıtý sharalary týraly aıtty.
Úkimet basshysynyń aıtýynsha, Mańǵystaý oblysynda bolǵan qaıǵyly oqıǵalar áskerı oqý-jattyǵýlardy josparlaý men ótkizý kezinde júıeli máseleler bar ekenin kórsetti.
— Qorǵanys mınıstrligi júrgizgen keshendi tekserý barysynda oqý-jattyǵýlardyń ótý barysyn baqylaýda, yqtımal qaýip-qaterlerdi baǵalaýda jáne jaǵdaı ózgergen kezde jedel áreket etýge daıyndyqta kemshilikter anyqtaldy, — dedi Oljas Bektenov.
Onyń sózinshe, oqý-jattyǵýlar kezinde qaýipti jaǵdaılarǵa jetkilikti mán berilmegen. Qaýipsizdik talaptarynyń saqtalýy tıisti deńgeıde qadaǵalanbaǵan. Sondaı-aq asa qaýipti kezeńderde oqý-jattyǵýlardy ýaqytynda toqtatý týraly sheshim qabyldaýda kemshilikter bolǵan.
Qazir Qazaqstan Qarýly kúshterinde áýeden baqylaý júrgizetin ushqyshsyz júıeler qoldanylady. Al kúshtik qurylymdardyń keıbir bólimshelerinde áskerı qyzmetshilerdiń qaı jerde júrgenin anyqtaıtyn jáne olardyń aǵzasynyń fızıologııalyq kórsetkishterin baqylaıtyn jeke qurylǵylar paıdalanylady.
Sonymen qatar kúshtik memlekettik organdar «Qazgıdromet» kásipornymen birlesip jumys isteıdi. Olar aýa raıynyń ózgerýi men daýyl týraly eskertýlerdi turaqty túrde alyp otyrady.
Premer-mınıstrdiń aıtýynsha, Prezıdenttiń tapsyrmasymen áskerı reforma josparynyń jobasy ázirlendi. Qujatta áskerdi basqarý júıesin jetildirý, oqý-jattyǵýlardy josparlaýdyń ortaq tártibin qalyptastyrý jáne áskerı qyzmetshilerdiń qaýipsizdigin qamtamasyz etý talaptaryn qatań saqtaý kózdelgen.
Eske sala keteıik, buǵan deıin Qaýipsizdik keńesiniń otyrysynda Qorǵanys mınıstri Memleket basshysyna Qazaqstan Qarýly kúshterin jańǵyrtý josparyn tanystyrǵan bolatyn. Prezıdent áskerı reforma josparyn maquldady. Jospardyń oryndalýyn úılestirý Úkimet pen Qaýipsizdik keńesine júkteldi.
Qazaqstan armııasyn qandaı ózgerister kútip turǵanyn osy jerden oqı alasyzdar.
