Kaspııdegi qaıǵyly oqıǵa: Mınıstrlik tiri qalǵan úshinshi áskerı qyzmetshi týraly aıtty
ASTANA. KAZINFORM — Qorǵanys mınıstrligi Kaspıı teńizindegi oqý-jattyǵý kezinde aman qalǵan úshinshi áskerı qyzmetshi týraly málimet berdi, dep habarlaıdy Kazinform tilshisi.
Mınıstrliktiń redaktsııa saýalyna bergen jaýabynda tiri qalǵan úshinshi áskerı qyzmetshiniń Batys Qazaqstan oblysynyń turǵyny Nıkıta Ýdalov ekeni aıtylǵan. Qazir ol dárigerlerdiń baqylaýynda, jaǵdaıy jaqsy, dep naqtylady vedomstvonyń baspasóz qyzmeti.
Buǵan deıin taǵy eki áskerı qyzmetshiniń aman qalǵany belgili bolǵan edi. Olar — Atyraý oblysynyń turǵyny Beket Qýandyq jáne Mańǵystaý oblysynyń turǵyny Aqjol Temirhan.
Oqıǵadan keıin Aqjol Temirhan aýyr jaǵdaıda aýrýhanaǵa jetkizilip, jansaqtaý bólimine jatqyzylǵan. Kelesi kúni esin jıyp, jaǵdaıy turaqtanǵan.
Beket Qýandyq ta dárigerlerdiń baqylaýynda, dep habarlady Qorǵanys mınıstrligi.
Buǵan deıin onyń ata-anasy Beket Qýandyqtyń aýrýhanaǵa jatqyzylmaǵanyn, ózin jaqsy sezinetinin jáne ózdiginen júrip-tura alatynyn aıtqan bolatyn.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy. Qaza tapqan batysqazaqstandyq sarbazdyń týǵan jerine oralýyna sanaýly kúnder qalǵan edi.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
Búgin Kaspııde eki áskerı qyzmetshini izdeý operatsııasyna júzdegen adam jumyldyrylǵany habarlandy.
Sonymen qatar áskerı qyzmetshilerdiń qaýipsizdigine jaýapty tulǵalar kúdikke ilingeni týraly jazǵan edik.
Aıta ketelik Kaspııdegi tótenshe jaǵdaıdan keıin qutqarylǵan áskerı qyzmetshi esin jıǵan edi.
Búgin Kaspıı teńizinde joǵalǵan eki áskerı qyzmetshiniń denesi tabylyp, izdestirý operatsııasy aıaqtalǵan edi.
Kaspııdegi áskerı qyzmetshilerdiń qazasyna baılanysty qylmystyq is eki bap boıynsha tergelip jatyr.
Qyzmetke salǵyrt qaraý jáne korabl júrgizý qaǵıdalaryn buzý boıynsha aýyr zardaptarǵa ákep soqqan qylmystyq quqyq buzýshylyqtar jasady degen kúdikpen Qazaqstan Respýblıkasy Qarýly Kúshteriniń joǵary jáne aǵa komandalyq quramyndaǵy jaýapty laýazymdy tulǵalar ustaldy.
Qorǵanys mınıstri, avıatsııa general-leıtenanty Dáýren Qosanov kináli tulǵalar jaýapkershilikten jaltarmaıtynyn aıtty.
Sondaı-aq, qaza bolǵan áskerı qyzmetshilerdiń otbasylaryna jınalǵan qarajatty arnaıy komıssııa bóledi.
