Kaspııdegi ıtbalyqtardyń qyrylýy búkil teńiz akvatorııasynda bolyp jatyr – AShM
ASTANA.KAZINFORM – Ortalyq kommýnıkatsııalar qyzmetiniń alyńynda Aýyl sharýashylyǵy mınıstrligi balyq sharýashylyǵy komıtetiniń tóraǵasy Serik Sermaǵambetov Kaspıı teńiziniń barlyq aýmaǵynda ıtbalyqtar qyrylyp jatqanyn aıtty.
Onyń aıtýynsha, óli ıtbalyqtardyń tabylýy jyl saıyn tirkeledi. Eń kóp 2024 jyly shamamen eki myń ıtbalyqtyń óleksesi tabylǵan. Osyǵan baılanysty olardy qorǵaý maqsatynda jergilikti atqarýshy organdarmen birlese jumys istep jatqanyn aıtty.
– Bul negizinen bizdiń aýmaqta emes, jalpy Kaspıı teńiziniń búkil akvatorııasynda bolatyn qubylys. Itbalyqtar Ázerbaıjan nemese Iran jaǵalaýynda qyrylýy múmkin. Al batystan soǵatyn daýyldy jelder olardyń ólekselerin Aqtaýdaǵy Kaspıı teńiziniń jaǵalaýyna qaraı alyp keledi. Osy máselege baılanysty biz jergilikti atqarýshy organdarmen jáne qoǵamdyq uıymdarmen birlesip áreket etý algorıtmin qabyldadyq. Sonymen qatar Memleket basshysynyń tapsyrmasymen Kaspıı ıtbalyqtaryn qorǵaý maqsatynda «Kaspıı ıtbalyǵy» memlekettik tabıǵı rezervaty quryldy. Qazirgi ýaqytta bul rezervat Aqtaý qalasynda óz jumysyn bastady, – dedi spıker.
Sonymen qatar vedomstvo ókili, ótken jyly qys mezgilinde osy aýmaqta keme qatynasyna shekteý qoıylyp, balyq aýlaý ýchaskeleriniń shekaralary qaıta qaralǵanyn aıtty. Olar ıtbalyqtardyń kóshi-qon baǵyttarynan alshaqtatyldy dedi ol.
Qazirgi ýaqytta 225 ıtbalyqtyń qyrylǵany tirkeldi. Aldyn ala málimet boıynsha, olardyń basym bóligi tunshyǵýdan ólgen. Bul teńiz túbindegi jer silkinisi men tunshyqtyrǵysh gazdardyń bólinýine baılanysty bolýy múmkin. Qyrylǵan ıtbalyqtardan juqpaly aýrýlardyń belgileri anyqtalǵan joq.
Aıta keteıik, Mańǵystaýda ıtbalyqtar men bekire tuqymdas balyqtardyń óleksesi tabyldy.
