Kaspııdegi áskerılerdiń qazasy: Aqtaýda úsh kúnge josparlanǵan merekelik sharalar ótpeıdi
ASTANA. KAZINFORM — Aqtaýda «Amfıteatr» alańyndaǵy merekelik is-sharalar ótkizilmeıdi, dep habarlaıdy Aqtaý qalasy ákimdiginiń baspasóz qyzmeti.
Ákimdiktiń málimetinshe, Mańǵystaý oblysynda áskerı oqý-jattyǵý kezinde oryn alǵan qaıǵyly oqıǵaǵa baılanysty 2026 jylǵy 25–27 qyrkúıek aralyǵynda Aqtaý qalasyndaǵy «Amfıteatr» alańynda ótkizilýi josparlanǵan merekelik is-sharalar ótkizilmeıdi.
— Atap aıtqanda, 25 qyrkúıekke josparlanǵan «Kaspıı — dostyq teńizi» festıvaliniń saltanatty ashylýy, sondaı-aq 27 qyrkúıekte ótetin festıval-baıqaýdyń jabylý saltanaty men Aqtaý qalasynyń týǵan kúnine arnalǵan merekelik gala-kontsert ótkizilmeıdi. Qala ákimdigi áskerı oqý-jattyǵý kezinde qaza bolǵan sarbazdardyń otbasylary men jaqyn-jýyqtaryna qaıǵyryp kóńil aıtady, — delingen vedomstvo habarlamasynda.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy. Qalǵandaryn izdeý jumystary jalǵasyp jatyr.
Keıinirek áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Mańǵystaý oblysynda áskerı qyzmetshilerdiń qaza bolý sebepterin tergep-tekserý jónindegi úkimettik komıssııa quryldy.
Komıssııa quramyna qorǵanys mınıstri, Mańǵystaý oblysynyń ákimi, Eńbek jáne halyqty áleýmettik qorǵaý, Tótenshe jaǵdaılar, Densaýlyq saqtaý, Kólik mınıstrlikteriniń basshylyǵy, Bas áskerı prokýror, sondaı-aq shekara qyzmetiniń ókilderi kirdi.
Sonymen qatar Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
