Kaspııdegi áskerı qyzmetshilerdiń qazasy: qylmystyq is eki bap boıynsha tergelip jatyr
ASTANA. KAZINFORM — Qazaqstan Respýblıkasy Premer-mınıstriniń orynbasary Qanat Bozymbaevtyń tóraǵalyǵymen ótken Úkimettik komıssııanyń otyrysynda birinshi kezektegi tergeý is-sharalarynyń nátıjeleri jáne bolǵan oqıǵanyń barlyq sebepteri men mán-jaılaryn anyqtaý jónindegi kezekti qadamdar qaraldy.
QR ishki ister mınıstriniń orynbasary Sanjar Ádilovtyń aıtýynsha, qaza bolý faktisi boıynsha Qazaqstan Respýblıkasy Qylmystyq kodeksiniń 453-babynyń 2-bóligi («aýyr zardaptarǵa ákep soqqan qyzmetke salǵyrt qaraý») jáne 465-baby («keme júrgizý qaǵıdalaryn buzý») boıynsha qylmystyq ister qozǵalǵan.
— Tergeý barysynda áskerı qyzmetshilerdiń qaýipsizdigin qamtamasyz etýge, oqý-jattyǵýlardy uıymdastyrýǵa jáne qutqarý is-sharalaryn júrgizýge baılanysty zań buzýshylyqtarǵa jol berdi dep kúdikke ilingen laýazymdy tulǵalar anyqtaldy. Olardyń is — áreketterine quqyqtyq baǵa beriledi, — dedi Sanjar Ádilov.
Oqıǵadan keıin qutqarylǵan áskerı qyzmetshiniń jaǵdaıy týraly másele jeke qaraldy. Densaýlyq saqtaý vıtse-mınıstri Manas Ramazanovtyń aıtýynsha, áskerı qyzmetshiniń jaǵdaıy turaqty, ómirine qaýip tónip turǵan joq. Áskerı qyzmetshi esin jıyp, barlyq qajetti medıtsınalyq kómekti alyp jatyr. Janynda ata-anasy bar.
Otyrys barysynda qaza tapqan jáne zardap shekken áskerı qyzmetshilerdiń otbasylaryna jan-jaqty qoldaý kórsetý jóninde naqty tapsyrmalar berildi. Atap aıtqanda, barlyq túsken qarajatty bólýdiń absolıýtti ashyqtyǵyn qamtamasyz etiledi. Bul rette materıaldyq kómek zańda belgilengen memlekettik tólemder men ótemaqylardy ǵana emes, sonymen qatar bıznes ókilderi men metsenattar tarapynan qarjylyq qoldaýdy da qamtıtyn bolady.
Osy qarajatty shoǵyrlandyrý úshin arnaıy qor ashyldy. Qor qyzmetin Mańǵystaý oblysynyń ákimdigi turaqty baqylaýǵa aldy.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
Búgin Kaspııde eki áskerı qyzmetshini izdeý operatsııasyna júzdegen adam jumyldyrylǵany habarlandy.
Sonymen qatar áskerı qyzmetshilerdiń qaýipsizdigine jaýapty tulǵalar kúdikke ilingeni týraly jazǵan edik.
Aıta ketelik Kaspııdegi tótenshe jaǵdaıdan keıin qutqarylǵan áskerı qyzmetshi esin jıǵan edi.
Búgin Kaspıı teńizinde joǵalǵan eki áskerı qyzmetshiniń denesi tabylyp, izdestirý operatsııasy aıaqtalǵan edi.
