Kaspııde úsh adam mingen qaıyq teńizge aǵyp ketti
ASTANA. KAZINFORM — Mańǵystaý oblysynda qutqarýshylar ashyq teńizge aǵyp ketken úsh adamdy tapty.
TJM baspasóz qyzmetiniń málimetinshe, ótken túnde Túpqaraǵan aýdanyndaǵy Kaspıı teńiziniń jaǵalaýynda qatty jeldiń saldarynan úsh adam otyrǵan úrlemeli qaıyq ashyq teńizge aǵyp ketken. Olardy izdeýge TJM kúshteri dereý shyqty.
— Qutqarýshylar joǵalǵan adamdardy taýyp, jaǵalaýǵa jetkizdi. Medıtsınalyq kómek qajet bolǵan joq, — delingen habarlamada.
TJM qazaqstandyqtarǵa eskertý jasap, jel kúsheıgen kezde sýǵa shyqpaýdy jáne qaýipsizdik erejelerin saqtaýdy surady.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy. Qalǵandaryn izdeý jumystary jalǵasyp jatyr.
Keıinirek áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Mańǵystaý oblysynda áskerı qyzmetshilerdiń qaza bolý sebepterin tergep-tekserý jónindegi úkimettik komıssııa quryldy.
Komıssııa quramyna qorǵanys mınıstri, Mańǵystaý oblysynyń ákimi, Eńbek jáne halyqty áleýmettik qorǵaý, Tótenshe jaǵdaılar, Densaýlyq saqtaý, Kólik mınıstrlikteriniń basshylyǵy, Bas áskerı prokýror, sondaı-aq shekara qyzmetiniń ókilderi kirdi.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtin boldy.
25 qyrkúıekte Qazaqstanda jalpyulttyq aza tutý kúni jarııalandy.
