Kaspııde shekara buzǵan úsh ázerbaıjandyq azamat ustaldy
ASTANA. QazAqparat - Mańǵystaý oblysynyń shekarashylary shekaradan zańsyz ótken jáne brakonerlik jasady degen kúdikke ilingen úsh Ázerbaıjan azamatyn ustady. Quqyq buzýshylar ýaqytsha ustaý oqshaýlaǵyshyna qamaýǵa alyndy, dep habarlaıdy «QazAqparat» HAA tilshisi «Moı GOROD» portalyna silteme jasap.
Shekara qyzmetiniń málimetinshe, memlekettik shekarany zańsyz qıyp ótken kúdiktiler Peschanyı múıisinen 17 shaqyrym qashyqtyqtaǵy Kaspıdiń qazaqstandyq bóliginen baıqalǵan. Úsh motorly qaıyqty shekarashylardyń «Nurly jol» kemesiniń ekıpajy ustady. Quqyq buzýshylar jyldamdyqty arttyryp, shekarashylar kemesinen qashyp qutylmaqshy boldy. Olardy toqtatý úshin shekarashylardyń aýaǵa birneshe ret eskertý oǵyn atýyna týra keldi. Qashyp júrgen kezde quqyq buzýshy azamattar aýlap alǵan balyqtaryn sýǵa tastap úlgerdi. Alaıda, shekarashylar balyqtyń tastalǵan ornyn birden tapty. Teńizden 35 kılometr balyq aýlaý jabdyqtary men 16 myń ilmek alyndy. 69 tiri bekire tuqymdas balyq anyqtalyp, teńizge jiberildi.
«Qazirgi ýaqytta ustalǵandarǵa qatysty QR QK-iniń 392-baby 1 bóliminde kózdelgen «Qazaqstan Respýblıkasynyń memelkettik shekarasyn qasaqana zańsyz kesip ótý» boıynsha sotqa deıingi tergeý amaldary júrgizilip jatyr. Ázerbaıjannyń úsh azamaty da ýaqytsha ustaý oqshaýlaǵyshyna qamaýǵa alyndy, olarǵa qatysty sotqa deıingi eki aı merzimde qamaýda ustaý sanktsııasy shyǵaryldy», - dep habarlady shekarashylar.
Eger ustalǵandardyń kinási dáleldense, olardy úsh jyldan bes jylǵa deıin bas bostandyǵynan aıyrý jazasy kútip tur.
