Kaspııde Reseı, Ázirbaıjan, Iran jáne Túrkimenstannyń aýmaqtyq sýlarynda korablder joryqqa shyǵady (FOTO)
ASTANA. QazAqparat - Aǵymdaǵy jylǵy maýsymnyń 25-i men shildeniń 2-si aralyǵynda QR QK Áskerı-teńiz kúshteriniń «Qazaqstan», «Oral» jáne «Saryarqa» zymyran-artıllerııalyq korablderiniń teńizge shyǵýy josparlanǵan.
Júzý úrdisin zerdeleý úshin korablder toby Kaspıı teńizi boıynsha joryqqa shyǵady, dep habarlaıdy QR Qorǵanys mınıstrliginiń baspasóz qyzmeti. Odan basqa, ekıpajdar júzbeli nysana arqyly korabl bortynan atys qarýynan oq atýlardy júrgizedi. Qazaqstandyq áskerı korablder Reseı Federatsııasy, Ázerbaıjan Respýblıkasy, Iran Islam Respýblıkasy jáne Túrkimenstan Respýblıkasynyń aýmaqtyq sýlaryn boılaı Kaspıı teńiziniń sý aıdyny arqyly ótedi. Oqý atystary Qazaqstan Respýblıkasynyń aýmaqtyq sýlarynda №217 jáne 244 aýdandarda ótkiziletin bolady.
Ótkeldegi jetekshi 29011 áskerı bóliminiń komandıri 2-dárejeli kapıtan Qanat Nııazbekov ekenin atap ótken jón.
Kaspıı óńiri Qazaqstan men álem memleketteriniń ekonomıkasy úshin máni zor. Kaspıı teńiziniń qazaqstandyq sektorynda memlekettik shekaraǵa qol suǵylmaý, aýmaqtyq tutastyqty, egemendikti, Qazaqstan Respýblıkasynyń ekonomıkalyq múddelerin qorǵaý QR QK Áskerı-teńiz kúshteriniń basty mindeti. Áskerı-teńiz kúshteri josparly damyp kele jatqanyn, korablderdi qurastyrý jáne satyp alý jónindegi qarqyndy jumys júrgizilip jatqanyn aıta ketý qajet. Sońǵy úsh jylda «Zenıt» Oral zaýyty» AQ otandyq kásipornynda qurylǵan 3 zymyran-artıllerııalyq korabl iske qosyldy.
